India tan Mizo pahnih - Dinmawia leh Fakmawii

56th Belgrade Winner Cup-ah India aiawha kal Mizo boxer pahnih Laldinmawia leh Lalfakmawii Ralte ten silver medal an dawng.

Inelnaah hian ram 28 aṭanga fuankhawmin India hian mipa pakua leh hmeichhe 10 a tir a; gold medal pathum, silver medal pali leh bronze pali an la.

Tuipui tlangval Dinmawia hi flyweight category-ah (57 kg) a tel a, round hmasa ber a bye avangin quarterfinal aṭangin a inhnek ṭan. Quarterfinal-ah Germany boxer Tauba Hamza chu 3-0 in a hneh a, semifinal-ah World championship medalist baka European champion leh 2012 London Olympian Filssi Mohammed hmachhawn lehin Algerian boxer hi 3-0 in an hneh.

Final-ah Dinmawia hian South Korean boxer Kim inkym nen an intawng a, ani hi 2017 Hamburg-a neih World Championship bronze medalist niin Mizo tlangval hi last round-ah vawi hnih point paih sak a nih hnuah 3-0 in a chak lo.

Vaivakawn nula Lalfakmawii hian 81+ category-ah inelna hi a hmachhawn a, semifinal a ni nghal. Fakmawii hian Turkish nula Dmitruva Alexandra chu 2-1 a hnehin bul a ṭan a, final-ah Turkish boxer tho lakah 2-1 in an chak lo.