Clay-a match 400 chak thei Nadal

Rafael Nadal chuan clay court hmang thiam chungchuang bik a nih zia a lantir zel a, Inrinni zan khan David Goffin hnehin Barcelona Open final a lut, clay bikah match 400 hnehna a chang tling ta.

World number 1 Nadal hian world number 10 David Goffin chu 6-4, 6-0 in a sawp a, semifinal lehlama Pablo Carreno Busta 7-5, 6-3 a hnehtu Stefanos Tsitsipas nen nizan khan final an khel zui a, he thu buatsaih lai hian result kan hre hman lo.

Grand Slam vawi 16 champion tawh Nadal hi tun hnaiah a zawnin clay-ah bik match 17 a chak tawh a, set 42 zet a la zawn tawh bawk. Belgium tlangval Goffin lakah a service hmasa ber hloh nghal mah se a chesual nawn lo, set hnihnaah phei chuan a service a hum vek bakah a khingpui service pawh a chhuhsak vek!

Nadal hian Barcelona Open nomawi hi vawi 10 a chawi tawh a, inelna khelhna court pui ber pawh ama hming chawiin 'Rafael Nadal Court' tia vuah a ni tawh.

Kum 31 mi Nadal chuan, "Player tawhkhirh tak tak mai Goffin lakah harsa lutuk loin hnehna ka chang thei a, result hian inrintawkna min siam belh. Engtik lai pawhin clay-a inkhelh hi chu nuam ka ti," a ti. Nadal hi a champion a nih chuan ranking-ah pakhatna a nih chhunzawm zel ang.