Steven Gerrard: Rodgers a hmelma thar?

Brendan Rodgers-a'n Liverpool-ah Steven Gerrard a chhawr duh tawh loh avangin a vanglaia Real Madrid, Bayern Munich leh Chelsea hnartu player hian MLS lam a pan phah.

Rodgers-a'n Scottish club Celtic a enkawl tawh a, a season hmasa berah nikum khan League Cup, Scottish Cup leh Premiership-ah a champion pui vek - Scottish football chanchina domestic treble a zawna chawi thei hmasa ber ni turin dinhmun duhawm takah an ding mek bawk.

Rangers-in an elpui ber ṭhin Celtic an pha lo lutuk hi a tihreh dan an zawng a, a chhanna nia an hriat chu Steven Gerrard a ni - Liverpool captain hlui hi Scottish club hian an dawr a, club-in thuchhuah la siam lo mah se Reds legend hian Scottish club zawm a remti niin khawthlang media te chuan an tarlang.

Rangers leh Stevie
Scottish football-a rorel leh tum mek Rangers hian manager duhthlan tur an chhawp nual a, chung zingah chuan Gerrard hi an duh ber a ni. Khelmual chhunga a naute kaihhruai a thiam avanga 'Captain Fantastic' tih hminglem an pek hi khelmual sir aṭang pawha a naute kaihruai thiam turah an ngai.

Khawthlang media te tarlan dan chuan Stevie hian Liverpool midfielder hlui, Scotland tana vawi 59 inlana Scottish football hrechiangtu Gary McAllister chu a assistant ni turin a hruai tel dawn.

Gerrard hian inbiakna an neih laiin Rangers lak aṭang hian transfer target an neih dan leh player hlawh atana budget an neih zat thlengin hriat hmasak vek a phut a, Rangers hian Gerrard-a duhna hi an ti hlawhtling niin a lang - he thuziak i chhiar meuh chuan Gerrard-a'n Rangers a enkawl tur thu hi official takin an puang tawh mai thei.

Gerrard sulhnu
Player-a nih laia PFA Premier League Team of the Year-a vawi riat lang thei Gerrard hian coaching lamah chuan tawnhriata la nei tlem hle. Kum 2017 khan League One club MK Dons-in manager tura an sawmna chu a hnar a, a tan a la hma mah mah niin a sawi.

MK Dons a hnar hnuah Liverpool academy-a coaching staff zingah a tel a, Jurgen Klopp leh LFC academy director Alex Inglethorpe te mit tlung taka hna a thawh avangin tun season ṭan dawn khan Liverpool Under 18 coach-ah kaisan tir a ni.

September 2017 khan Liverpool U19 chu UEFA Youth League-ah a kaihruai dawn tih Reds-in an puang a, last 16-ah Manchester United hnehin quarterfinal hruai thleng mah se Manchester City chu penalty-ah an ngam lo a, semifinal an lut thei lo.

Liverpool thlawpna
Liverpool boss Jurgen Klopp chuan Stoke nen Inrinni zan an inkhelh hmaa press conference-ah Gerrard an dan loh tur thu a lo sawi tawh. German coach chuan, "Steven hi engtiklai pawhin Liverpool legend a ni reng ang.

"Hmalam pan a tum zelna kawngah dal kan tum lo a, keini chuan kan thlawp tlat zel ang. Player a nih anga tawnhriat ropui tak nei, coaching lama hmasawn chho mek a nih avangin club-in lakluh an duh hi a mak lo"

"Keipawhin club nei ta ila, Stevie hi coach turin ka duh ve tho ang," a ti a, Liverpool captain hlui a fak hle.