AFC U16 India hmabak a hautak dawn

AFC Under 16 Championship chu September 20-ah khelh ṭan a ni dawn a, Malaysia-a neih tur he inelna pual hian draw neih a ni tawh - India hmabak a hautak dawn.

India U16 hi group C-ah Iran, Vietnam leh Indonesia te nen an awm ho a; 2008 khan Iran hi an champion a, 2016-ah final lut mah se Iraq an ngam lo thung.

Iran manager Hossein Moradi chuan, "India nen hian tun hnaiah kan inkhel fo a, hmabak a hautak dawn tih kan hria," tiin group duhthusama an awm bik loh thu a sawi.

AFC rawlthar rual inelna turah hian team 16 an tel dawn a, group pali-ah team pali zel awmin ṭhenhran an ni. Group tina a sang pahnih hian quarterfinal an lut ang.

India U16 chu AFC U16 inbuatsaih nan hian ram pawnah match khelin an zinkual reng a, Hong Kong-a neih Jockey Club International Youth Invitational Football Tournament-ah phei chuan an champion.

India U16 team-ah hian Serchhip midfielder Eric Remruatpuia Chhangte, Lunglei goalkeeper Lalbiakhlua Jongte, Lengpui midfielder Lalrokima leh Armed Veng rawlthar Lalchhanhima Sailo te chu an tel ṭhin a, AFC U16 pawh hi an khelh ngei a rinawm.