Golden State Warriors an chak phawt

Nimin zing khan NBA Western Conference semifinal game 1 khelh a ni a, Golden State Warriors chuan an khingpui New Orleans chu 123-101 in an hneh nghal.

Oracle Arena-a inkhelah Golden State tan hliam vangin Stephen Curry a la inlan thei lo a, court chhunga langsar ber chu Draymond Green a ni. American power forward hian Triple-double nei turin point 16 a score bakah rebounds vawi 15 lain, assists vawi 11 a nei bawk.

GSW hi regular season-ah duhthusamin an cheṭha tawk lo a, pahnihna an ni. Playoff chinah erawh team hlauhawm an ni a, San Antonio Spurs lakah 4-1 in hnehna an chang a, conference semifinal game 1-ah hian quarter hmasa pathuma chungnung vek chungin hnehna an chang thei a, Nilaini zing dar 8:00-ah game 2 an khel leh ang.

Indiana Pacers-in Cleveland Cavaliers chu game 6-ah 121-87 in an hneh a, 3-3 in an hnehtawk chiah. Nizan khan game 7 khelh a ni a, result kan hre hman lo. A chak zawk hian Eastern conference semifinal-ah Toronto Raptors an hmachhawn ang.

Western Conference-ah semifinal khel tur a hriat kim ta a, Utah Jazz chuan Oklahoma City chu 96-91 in an hneh a, semifinal-ah Minnesota Timberwolves hnehtu Houston Rockets nen nizan dar 1:00 khan game 1 an khelh nghal. Eastern Conference-ah Boston Celtics chuan 112-96 in Inrinni zing khan Milwaukee Bucks an hneh a, 4-3 in series an la. Celtics hian naktuk zing dar 5:30 hian Philadelphia 76ers nen semifinal game hmasa ber an khel ang.