Reds chak zawh loh zanah Chelsea beiseina a nung thar

Liverpool-in Stoke City an mikhual zanah goal an khung theih loh avangin point khatah an lungawi a ṭul a, hetihlai hian Chelsea chuan tlak hlau Swansea City chu 1-0 a an hneh avangin Champions League an thlir ve leh thei ta thung.

Chelsea aia match khata khel tam zawk Liverpool hian table-ah pathumna dinhmun an luah chhunzawm zel a, Blues aia an sanna chu point ruk chauh a ni tawh. Season hmasaa Premier League nomawi chawitu Antonio Conte chuan, "Point thum kan hmu a, season thara Champions League khelh kan duh chuan vawiin kan result hi a pawimawh em em a ni," a ti.

Hetihlai hian Chelsea laka an tlawm avangin Swansea dinhmun ṭha tawh lo sa a ṭhat loh belh a, Southampton-in 2-1 a Bournemouth an hneh bawk si avangin 18-na Saints aia an sanna chu point khat chauh a ni tawh. Liverpool 'draw' tu Stoke-in 19-na dinhmun an luah bawk a, an dinhmun a him lo takzet. West Brom-in 1-0 a Newcastle United an hneh avangin beiseina chhete an la nei ve bawk.

Lunghnur duh lo Klopp
Liverpool-in Stoke City lakah goal khung thei lo mah se manager Jurgen Klopp erawh a hnual phah duh lo. German coach chuan, "Ka team ten khel se, ka tiha ka hmuh duh ang zawng zawng chu ka hmu kim deuhthaw a, goal hmaa vanneihna, hlimna leh lawmna chauh chu ka thil hmuh hmaih a ni," a ti.

Anfield-ah Liverpool an vanduai a tih theih bawk. Georginio Wijnaldum ball cross chuan penalty area-ah Stoke defender khel ṭha Erik Pieters kut fuh mah se referee-in a hmu hmaih (?) a, Klopp a lungawi lo hle. Liverpool boss chuan, "Penalty chiang tak a ni a, tun season-ah hian kan hmuh ngei tur penalty vawi tam pek kan ni tawh lo," a ti a, a lungawi lo.

Liverpool thiampuipa Mohamed Salah-a'n inkhel bul ṭan mah se Stoke defending khauh tak karah Egyptian forward a langsar hleithei lo a, Jordan Henderson-a ball pass-in hmun awl a siamsak hnuah Salah hian league-a a goal 32-na a khung ngei dawn niin lang mah se Jack Butland a chip khum chu a out.

Nghak hram la...
Salah hian Stoke lakah khan goal khung ni se chuan kum 1995-a Premier League team 20-a tih hniam a nih hnua season khata league goal 32 khung tling thei hmasa ber a ni dawn tihna a ni–tunah erawh a nghah leh hret a ngai ta.

AS Roma winger hlui hian Stoke goal-ah vawi sarih ngawt a pet a, target-ah a kal lo vek. Salah-a'n tun season Premier League-a goal khung miah lo chunga shot a ngah ber ṭum a ni! Salah hi Stoke defender Pieters chuan a dah ṭha a ni ber.

Stoke manager Paul Lambert chuan, "Salah hi tun season-ah a khel ṭha em em a, mah se Pieters khan a khel ṭha chungchuang a ni," tiin defender tam zawk tih theih loh titu a defender a fak.

Blues beiseina
Chelsea tan Cesc Fabregas chuan minute lina lekah goal hmahruai a khung a, Blues chak nan hei hi a tawk. Premier League-a Fabregas goal 50-na avangin Chelsea-in beiseina an neih thar ve leh a, Conte-a'n an hmabak match zawng zawngah chak vek an tum thu a sawi.

Blues manager chuan, "Kan kutah a innghat tawh lo a, mah se Tottenham tibuai tur chuan kan hmabak match zela hnehna chan hi a ṭul hmasa chu a ni. Spurs hian Watford an hmachhawn dawn a, mah se football awlsam lohzia kan hria," tiin anmahni ang thoa London club a sawi ṭhaih.

Chelsea hian match khata khel tam zawk chungin Tottenham hi point hnihin an phak lo mek a, Spurs hian zanin dar 12:30-ah Watford an mikhual dawn–hnehna an chan zawh loh chuan khelh zat inangah Blues aiin point hnih chauhin an sang tawh dawn tihna a ni a, Champions League khelh inchuh boruak a ngaihnawm zel.

Hmabak chu
Chelsea-in league match thum khelh tur an la nei a, an hmabaka awm hi Liverpool, Huddersfield leh Newcastle United a ni a, a awlsam dawn lo. Liverpool hi match khata khel tlem chungin point rukin an phak lo mek a, Stamford Bridge-ah Reds an hneh thei a nih ngat chuan 'point ruk' ang deuhthawa chhiar theih a ni ang.

Hriat tel atana ṭha chu Liverpool hian Nilaini zanah AS Roma nen Champions League semifinal an khel hah dawn a, Blues tan hei hi remchanga laa an ṭhat theih dan bera Liverpool lo mikhualna remchang a ni.

Tottenham-in zanin an inkhel tur chhiar tel lohin league match hnih khelh tur an la nei a, West Brom leh Newcastle United an tum ang. Liverpool-in Chelsea baka hmachhawn tur an la neih chu Brighton & Hove Albion an ni.