A tawpah Juventus an hlim
Hun tawp hma minute nga chauh awm tawhah Juventus lamin player 10-a khel Inter Milan lakah goal hnih an khung a, San Siro-ah 3-2 a hnehna changin Serie A hmahruaitu an nihna an chhawm nung.
Red card pahnih, own goal pahnih leh goal hlu bik bakah hun tawp dawn inkhel boruak sang lutuk awmna Juventus leh Inter Milan intawng hi tun season Serie A inkhel hmuhnawm ber pakhat a tling.
Juventus-in an nomawi humhim turin an chetsual a thiang tawh lo a, Inter nen an inhnehtawk mai dawna a lan hnuah hun tawp hma chiahin Gonzalo Higuain-a'n chakna goal a tauh lut.
Turin club hian match 35 khelh aṭangin point 88 an hmu a, an hnuai chiah awm Napoli lakah point liin an sang zawk - Nizan khan Napoli leh Fiorentina an inkhel a, resut a zirin an inthlauhna hi a la danglam leh thei.
A hmuhnawm
An match hnuhnung bera Naopli hneh lotu Juventus player ten chak loh nawn an tum lo, mikhual tana inkhelh harsatna hmunah huaisen takin bul an ṭan; minute 13-na lekah Douglas Costa-a'n goal hmahruai khungin beiseina an nei sang hle.
Goal hmasa luh aṭanga minute nga hnu lekah Inter Milan midfielder Matias Vecino-a'n Juve striker Mario Mandzukic a tihtluk chu video assistant referee (VAR) hmanga endik a ni a, Uruguay international Vecino hi thiam loh chantir niin hnawhchhuah a ni - Old Lady tan thu lawmawm lam zel a ni.
Mahse, player 10 an nih hnuah Inter an hlauhawm sauh. Second half-ah Ivan Perisic thawhrah sengin Mauro Icardi-a'n tun season-a a goal 27-na a tauh lut a, defender Andrea Barzagli chuan an lama a tih luh palh avangin Inter lamin 2-1 in hma an hruai let daih.
Season thara Champions League khelh tum Inter an ṭang rei thei viau a, point thum an hmu ngei dawn niin a lang hman. Mahse, hun tawp hma minute nga chauh a awm tawh tihah defender Milan Skriniar-a'n anmahni lamah ti lutin mikhual team lamin an si phurh an sut zo.
Paulo Dybala free kick ropui taka dangtu goalkeeper Samir Handanovic-a'n a team tan point thum hlawh chhuak teuh viau mah se, Argentine international hian set piece aṭangin ram tana a khelhpui Higuain goal khung tur a siamsak ta tho.
Allegri out!
Argentina international Higuain-a'n chakna goal a khung avangin Juventus player leh fans an sapatal a, coach Massimiliano Allegri pawh a lawm dan a uchuak em avangin hnawhchhuah a ni.
A zawna season ruk chhung Serie A nomawi chawi tawh Old Lady hian Napoli lakah hmahruaina an hloh ngei dawn nia a lan hnuah an him leh rih a, minute 716 chhung league goal khung tawh lo Higuain-a'n a hunah tak goal a khung.
Italian manager Allegri chuan, "Team pahnih hnehna chan mamawh ten inkhel ropui kan lantir a, zaninah hian football ropuina kan hmu, football-ah chuan thil chiang hi a awm thei lo reng a ni," a ti a, an khingpui Inter huaisena chu a fak bawk.
Kum 50 mi Allegri chuan an elpui chhaih nghalin, "Napoli chuan an match hmabak paliah hnehna an chang vek tawh ang," tiin an tan chetsual a thian loh thu a sawi. Juve hian Bologna, AS Roma leh Hellas Verona te an la hmachhawn leh dawn a ni.
Pawm a har
Inter Milan manager Luciano Spalletti chuan si an phur hmasa leh, player an kim lo chunga hma an hruai let thei chu a lawm thu a sawi a, chutihrualin hun tawp dawna an tlawm chu pawm thiam harsa a tih thu a sawi.
Spalletti chuan, "Ka naute khan chak loh an phu lo, point hmu turin an khel ṭha tawk a ni. Player ten an theihtawp an chhuah a, khawl an nih bik loh avangin tihsual chu awm thei a ni," tiin a sawi.
Italian manager chuan sawi zawmin, "Referee Daniele Orsato chungchangah sawi tur ka nei lo a, chutihrualin VAR hi thil ṭha leh dik ber a ni em tih erawh ngaihtuah nawn tham a tling," tiin an player hnawhchhuah chungchangah VAR chu thil ti dik vek bik lo niin a ngai.