A hun têa rah ṭhîn RONALDO

Old Trafford-ah player ṭha bikin minute 95-naah chakna goal a khung a, Manchester United ṭantute an hlim hle. Goal khungtu hming chu Cristiano Ronaldo a ni a, Portuguese forward hi hun bik atana siam a ni a, a hun têah a rah leh ta.

Nilaini zan khan Man United-in Europa League final-a an hneh loh Villarreal an mikhual a, Spanish team hian Paco Alcacer hmangin goal an khung hmasa. Mualneituin Alex Telles-a goal ropui hmangin siphurh an sut a, tun hmaa Fergie Time an tih hunah Ronaldo-a'n chakna goal a khung.

Group F inkhelah dangah Atalanta-in Matteo Pessina goal hmangin Young Boys 1-0 in an hneh a, Italian club hi point li hmuin hmahruaitu an ni. Man United leh Young Boys hian point thum an hmu a, Villarreal hian point khat chiah an la hmu thung.

De Gea a langsar
Man United tana bul ṭantu zingah Jadon Sancho rawn telin Ronaldo, Bruno Fernandes leh Mason Greenwood te nen tlarhmaah an awm. Midfield laiah Paul Pogba leh Scott McTominay te an inkawp a, bench-ah Fred a awm.

Inhliam leh hrem vangin tlarhnung an inthlak hlawk a, Raphael Varane leh Victor Lindelof inkawpin mual sirah Telles leh Diogo Dalot te an awm. Mahni muala khel an nih ang ngeiin nung phatin Man United-in bul ṭan mah se a hnu lama langsar ta ber chu keeper David de Gea a ni.

Aaron Wan-Bissaka awm loh a lang a, Dalot-a awmna lam aṭangin Yellow Submarine-in chance ṭha an ngah. Minute 10 pawh tling loah Arnaut Danjuma-a'n chance ṭha insiamin De Gea-a'n a dang ṭha hle.

Villarreal-in a khat mawi tawkin chance an nei a, ding lam aṭanga Danjuma cross chu Alcacer-a'n tauh ṭha mah se Spanish keeper-in a nam per hman.

Alcacer pawhin Varane-a tihsual vanga a chance ṭha bik chu goal pawnah chiah a pet. First half tawp hma deuhin De Gea-a'n Yeremy Pino goal khung tur ṭha deuhin a dang bawk.

A goal ta
First half-ah Man United an vannei a, second half-ah an insiamṭha lo. Minute 53-naah Dalot-a awmna aṭangin Villarreal-in an nawr a, Danjuma cross chu Alcacer-a'n a tlawh lut.

Man United ben harhin an awm a, Fernandes-a'n box pawn aṭangin ṭha zetin pet mah se goal a pet lo. Minute 60-naah erawh Telles-a'n goal ropui a khung. Fernandes-a'n freekick petin box chhungah pet loin Telles tan a vawrhsak a, box pawna awm Brazilian wing back hian ball hi boruaka a awm laiin a hlap goal.

FC Porto aṭanga Man United zawmtu Telles-a'n English club tana a goal hmasa ber a khung a, Ole Gunnar Solskjaer hote tan chak beiseina a awm thar.

Mahse, Villarreal-in minute 90 chhungin goal an khung teuh zawk. Minute 86-naah substitute Moi Gomez ball pet chu keeper De Gea-a'n a save sak a, hemi per hi Boulaye Dia-a'n goal su leh nghal mah se keeper zawnah a chiah a kal. Dia bawk hian ball per hi goal-ah a pet leh a, Telles-a'n a dang.

Ronaldo nge nge
Man United-in UCL match hmasa berah Young Boys an hneh lo a, Old Trafford-a match hnuhnung pahnihah West Ham leh Aston Villa an hneh lo. Solskjaer-a hoten chhantu an mamawh a, mamawh chhanna chu Ronaldo a ni.

Injury time-ah Ronaldo cross chu Jesse Lingard-a'n goal-ah tlawh mah se keeper Geronimo Rulli-a'n a dang ṭha hle. Hun tawp hma chiahin vei lam aṭanga substitute Fred-a cross chu Ronaldo-a'n box chhungah a tauh thla a, Lingard-a'n Portuguese forward tan pe let lehin Man United number 7 hian chakna goal a khung.

Old Trafford-a inkhel entu mipui an lawm a, Sir Alex Ferguson leh Usain Bolt te pawhin an chezia hmangin an hlim tih an lantir. Ronaldo pawhin a goal khung lawm nan kawr a phelh a, kum 36 mi nichunga a taksa la mawizia a hmuh theih. Man United-in 2-1 in hnehna an chang a, Europa League final-a an hneh loh Villarreal lakah phuba an la.

A thleng tawh ṭhin
Manchester United-in Villarreal 2-1 in an hneh a, Old Trafford-a an hlapui chu 'Viva Ronaldo' tih a ni. Ole Gunnar Solskjaer kaihhruai Man United-in tun hma pha lo mah se a boruak chu tun hma ang tho a ni a, danglamna thlentu Ronaldo vang a ni.

Norwegian manager Solskjaer chuan, "Old Trafford-ah chuan hetiang hi an thleng ṭhin. Tun ang hi tun hma pawhin a thleng fo tawh a, risk kan la a, a tawpah kan vannei. A chang hi chuan game dik vang lam a ni lo a, mipuiin boruak ṭha an siam a, Cristiano neih bawk chuan chance hi a awm leh ṭhin. Goal hmaah a ṭha chungchuang a, a huhang hi a lian em em a ni," tiin chakna goal khungtu a fak.

Ronaldo hian Old Trafford-a a let hnuah match nga khel tawhin goal nga a khung tawh a, Aston Villa a hmachhawn ṭum chauhin goal a khung lo. Portugal captain hian Newcastle, Young Boys, West Ham leh Villarreal lakah goal a khung vek.

Kum 36 mi Ronaldo hian UCL-ah match 178 khelin Iker Casillas (177) record khumin Europe inelna sang berah khel tam record thar a siam a, goal 136 khung tawhin top scorer a ni mek bawk. Man United forward Ronaldo chuan, "Chak ngei kan duh avangin kan hlauthawng a, inkhelh a harsa. Match tawp berah kan vannei lo a, tun ṭumah kan vannei ta thung. Beisei kan nei tlat a, point thum kan hmuh avangin kan dinhmun pawh a ṭhat phah," tiin a sawi.

Manchester United hian October 2, Inrinni zanah Everton an mikhual lehnghal dawn a, international break a awm chhunzawm ang. Solskjaer leh a hote fixtures a harsa chho dawn a, international break zawhah Leicester City, Atalanta, Liverpool, Tottenham, Atalanta leh Man City te an tum chho dawn a ni.