Durand Cup final-ah Goa

FC Goa chuan Durand Cup final thleng turin Nilaini zan khan Bengaluru an hneh. Salt Lake Stadium-a inkhel hmuhnawm takah hun pangngaiah 2-2 in an inhnehtawk a, penalty shootout-ah Mizo tlangval Lalhmangaihsanga (Papuia) telna Goa hi 7-6 in an chak. Nomawi inchuhna hi October 3, Pathianni zan dar 6:00-ah ISL club Goa leh Kolkata club ṭha Mohammedan te an inkhel dawn a, Sony Ten 2-ah a en theih ang.

Semifinal hnuhnung zawkah Goa leh Bengaluru te an inhnehtawk hle. Bengaluru-in Sivasakthi Narayanan hmangin minute khatna lekah keeper tihsual vangin a khung a, Goa-in minute riatnaah Devendra Murgaonkar hmangin an sut.

Goa-in Redeem Tlang hmangin minute 71-naah hma an hruai a, Bengaluru-in Narayanan hmang bawkin an sut a, extra time-ah goal a luh belh lo. Penalty shootout-ah Goa 7-6 in an chak a, goal khungtu zingah Papuia a tel.

Armed Veng South tlangval Papuia hi Chhinga Veng FC leh Aizawl FC junior team tan a khel tawh a, tun ṭum Durand Cup-ah hian Goa tan bul a la ṭan vek. Feet nga leh inches 10-a sang defender Papuia chuan, "Final-ah pawh kan inhnehtawk khawp ang. Mohamedan aiin foreigner kan nei ṭha zawkah ka ngai a, Indian player erawh kan intluk tawk. Kan player ṭhenkhat hi ram tan khel turin an feh chhuak a, kan kim lo," tiin Vanglaini a hrilh.