Mizoram cricket team an chak

Board of Control for Cricket in India (BCCI) hnuaia inelna chi khat - Vinoo Mankad Trophy 2021 khelh laiah Mizoram Cricket Under 19 team chuan Nilaini tlai khan Arunachal Pradesh chu run 7 (VJD method) in an hneh.

Vawiin chawhma dar 9:00 hian Ranchi-ah Mizoram hian Meghalaya an hmachhawn leh ang - Cricket Association of Mizoram team hi plate group-ah awmin, Nagaland leh Manipur an la hmachhawn leh bawk ang.

Hnehna chu
Match hmasa berah Mizoram an che fuh lo, CAM hnuaia team naupang tak la ni ve tho Sikkim lakah run 152 zetin an tlawm a nih kha - Mizoram tan mualphona a ni, chak lo nawn ni se beiseina a thamral tluk a ni dawn.

Mahse, Nilaini inkhelah erawh boruak a danglam - ṭhumvawrah Mizoram hi vannei zawkin vuak hmasak an thlang. Captain K. Vanrotlinga'n ball 55 a hmachhawn aṭangin run 62 zet a vaw chhuak a, an chakna hnar pawimawh a ni.

Mizoram tan C. Vanlalhruaia'n run 35 a siam bakah, Malsawmtluanga (5 runs), Marcus Lalpekhlua (3) leh Remruatfela (1) ten run an siam bawk - hnehna chan a lawmawm a, tualchhung player ten sulhnu ṭha an hnutchhiah hi a lawmawmna ti zualtu a ni ang.

Vinoo Mankad Trophy?
BCCI hnuaiah inelna hrang hrang awm, tuna Mizoram team khelh lai hi mipa kum 19 hnuai lam inelna niin, ram chhung state hrang hrang aṭangin team an inlan. Group match bik hi Ranchi, Indore, Hyderabad, New Delhi, Chandigarh, Mohali leh Ahmedabad-ah te khelh a ni.

Mizoram hi plate group-ah an awm - Mizoram bakah hian Sikkim, Arunachal Pradesh, Nagaland, Meghalaya leh Manipur te an awm khawm - knock out stage lut tur chuan group hmahruaitu nih a ngai dawn a, kawng a awlsam lo.

Knock out stage chin hi Ahmedabad-ah vek khelh a ni dawn a, October 18, Thawhṭanniah inelna hi zawh tura ruahman a ni.