November-ah Ballon d'Or sem dawn

Football khawvela mimal chawimawina ngaihhlut hlawh ber Ballon d'Or chu hri leng vanga nikum lama an sem loh hnuin kuminah erawh sem a ni dawn a, he award sem chhuaktu France Football chuan November 29-ah award hi pekchhuah a nih tur thu an sawi.

Khawvela footballer ṭha ber thlanna hi khawvel hmun hrang hranga journalist-ten an nei ṭhin a, nikum khan journalist 176-in vote an thlak a, kuminah hian ram 180 aiawh journalist ten vote an thlak dawn nia sawi a ni thung.

France Football magazine editorial board chuan footballer ṭha zual 30 hming an chhawp chhuak ang a, heta ṭang hian journalist-ten an player duhzawng an lo thlang chhuak ve leh dawn a ni.

Journalist-te hian player panga an thlang chhuak ang a, pakhatna chu point ruk pein, pahnihna (4 pts), pathumna (3 pts), palina (2 pts) leh pangana (1 pt) in points an pe ang a, point hmu hnem ber player chuan award hi a dawng ang.

Ballon d’Or sem hnuhnung ber 2019-ah khan Lionel Messi chuan he award hi a vawi ruk nan a dawng a, dawng hnem ber record a siam - khami ṭum khan Messi hian point 686 a hmu a, VVD-a'n point 679 hmuin a hnaih hle.

Pakhatnaa thlangtu ngah berin award hi an dawng kher lo. Kum 2019-ah pawh VVD hian pakhatnaa thlangtu journalist 68 a nei a, Messi-a'n 61 a nei thung - mahse, a tawpah point belhkhawm a ni a, top three-a thlangtu ngah zawk Messi-a'n point hmu hnem zawkin VVD a khum a ni.

Khawvela mipa footballer ṭha ber thlannaah hian Ballon d'Or Féminin (hmeichhia) pawh sem a ni dawn a, thlan bik journalist 50-in an thlang ang. Kum 21 hnuai lam player ṭha ber thlanna Kopa Trophy pawh sem a ni dawn a, Ballon d'Or award dawng tawh player 32-in an thlan tur a ni a, goalkeeper ṭha ber Yashin Trophy dawng tur chu journalist 180 thoin an thlang dawn bawk.

Kumina Ballon d'Or dawng thei tur zingah Copa America-a Argentina champion puitu Lionel Messi, Bayern Munich goal khung khawl Robert Lewandowski leh UEFA Men's Player of the Year ni lai Jorginho te hming a ri ring viau a, Manchester United a kir hnua boruak nei lian tak Cristiano Ronaldo pawh thai bo a harsa ang.