Goal khung in duh em? Barcelona an awm e!

Levante laka 3-0 zeta an chak avanga an phur zualpui pawh a reh hmain Barcelona an zuai lehnghal a, Champions League-ah team ṭha lo zawka ngaih Benfica chuan 3-0 in an lo sawp - kartawp La Liga-ah Atletico Madrid-in an lo hmuak!

Mualneitu Benfica tan Darwin Nunez chuan goal hnih khungin Rafa Silva chuan goal khat a khung ve bawk a, Barca defender Eric Garcia chu minute 87-naah a yellow card pahnihna a hmuh avangin hnawhchhuah a ni bawk.

Barcelona hian an match hmasa zawkah Bayern Munich chu 3-0 ngawtin an lo ngam tawh lo bawk a, an club chanchina a vawi khat nan Champions League-a an match hmasa pahnihah an tlawm ve ve.

Ronald Koeman erawh a zam phah lo a, Barcelona coach chuan, "Ka player-ten min thlawp tih ka hria," a la ti cheu a, hetihrual hian, "Midang erawh ka hre lo," a tih zui avangin thuneitu lamah chuan a tlatlum tawh lo tih a chiang.

Beisei loh result
Champions League draw neih a nih khan Barcelona-in group E-ah Bayern Munich an awmpui dawn tih chiang mah se an elpui tur dang hi Benfica leh Dynamo Kiev a nih avangin Barca fans an hnual hran lo a, tlang mai rinna an nei.

Bayern an hneh loh ṭum pawhin a result ngawr ngawr ai mahin an khelh dan chu an lawm lohna a ni a, hmabakah Benfica leh Dynamo an la awm avangin tlang mai inbeiseina an la nei cheu. Mahse, Nilaini zana inkhelah erawh beisei loh thawnthuin a ṭhawng.

Inkhel ṭan aṭanga second 133-na lekah Benfica tan Nunez chuan goal hmahruai a khung nghal a, Barca a barakhaih. Catalan club tan Luuk de Jong chuan si phurh sutna remchang nei zui mah se Sevilla aṭanga an lakluha fan-te lawm loh chhan a pholang a, holam takin a hlah.

Barca an insiamṭha lo. Rafa Silva chuan minute 69-naah Benfica tan a khung belh a, minute 10 hnuah Sergiño Dest-a'n handball vangin penalty a chawi zui - Nunez chuan penalty hi a goal hnihna ni turin a khung a, Benfica chu 3-0 in hnehna a chanpui.

Record duhawm lo
Barcelona-in match hnihah point hmuh an neih loh avangin an group-ah table mawngphah an luah mek a, 2003-04 a Champions League khel tura an tlin loh hnua a vawi khat nan Champions League knockout round khel lo thei dinhmunah an ding mek.

Koeman chuan, "Ka team leh tun hmaa Barcelona team khaikhin hi a ṭulna ka hre lo a, he club tana ka hnathawhah chiah hian ka ngaihdan ka sawi thei ang," a ti a, Barca team tlachhe mek leh an team ropui ṭhin khaikhin a remti lo.

Barca an tlawm leh tak avangin Koeman dinhmun nghet lo sa erawh a nghet lo lehzual tih a chiang a, midfielder Frenkie de Jong chuan a pu hi chhan vatin, "Coach thlakin danglamna a thlen lo ang," a ti a, captain Sergio Busquets chuan, "Koeman ban chu thil awlsam a ni mai thei a, mahse, kan vai hian tih tur kan nei vek a ni," tiin a sawi ve bawk.

Catalan club-in Lionel Messi nei tawh lo mah se Marc-André ter Stegen, Frenkie de Jong, Gerard Piqué, Busquets, Pedri leh Memphis Depay te ho bul an la ṭantir thei a, Koeman-a'n tih dik loh lai a nei tih chu a chiang.

Inkhel Chhehvel
• Champions League inelnaa an tela Barca-in last 16 an luh loh hnuhnung ber chu 2000-01 season kha a ni a, hemi ṭum pawh hian match hmasa berah Leeds United sawp mah se Besiktas leh AC Milan lakah a zawnin an tlawm a, a tawpah an tuar.

UEFA Cup 1972-73 hnua a vawi khat nan European football inelna an hmachhawna an match hmasa pahnihah Barca an tlawm. 

Barcelona in an match hmasa pahnihah goal ruk chhhuahin goal khung an la nei lo a, hetiang anga record nei chhe chunga Champions League last 16 lut thei chu 2007-08 season-a Lyon chiah kha an la ni.

Koeman-a'n Barcelona coach a nih hnuah Champions League group stage match riatah a team a kaihruai tawh a, vawi thum a tlawm. Barca coach zinga ani aia group stage-a tlawm hnem chu Louis van Gaal chiah a ni a, Manchester United coach hlui hi vawi nga a tlawm a, match 32-ah Barca a kaihruai thung.

Barcelona-in Champions League-a an match hnuhnung pangaah chak an nei lo - vawi li an tlawm a, vawi khat an draw a, hemi hmaa an match hnuhnung 39-ah vawi li chiah an tlawm.