Bayern-in goal an surtir

Barcelona-in Champions League match hnihah goal an la khung loh laiin Bayern Munich chuan goal riat an khung der tawh - Nilaini zan khan an mikhual Dynamo Kiev chu 5-0 ngawtin an sawp a, Robert Lewandowski chuan goal hnih a khung leh ta.

Polish striker hian goal khung turin a nghah rei a ngai lo. Minute 12-na lekah Joshua Kimmich corner pet aṭanga ball kal chu Kiev captain Serhiy Sydorchuk chuan a kutin a lo tawk fuh a, penalty an chawi.

Allianz Arena-a inkhelah Lewy chuan penalty hi goal-ah a chantir a, minute 27-naah goal hnihna a khung zui - Bayern tana a match hnuhnung 100-ah goal 119 a khung a, tun season-ah match kua a khelh aṭangin goal 13 a khung tawh!

Kum 33 mi striker hian Champions League-a a match hnuhnung 18 aṭangin goal 24 a khung ta bawk a, goal hnih emaw a aia tam khungna hi Champions League-ah match 19 a nei tawh bawk.

Bayern Munich goal dang hi Serge Gnabry, Leroy Sane leh Eric Maxim Choupo-Moting ten an khung a ni a, match hnihah hnehna an chan avangin group E-ah hmahruaitu an ni mek.

Season hmasaa fan-te lawm hlawh lo Sane pawhin fan-te lawmna tun season-ah a siam ta fo - inelna hrang hrangah match 10 khelin goal li a khung a, assist vawi sarih a nei ta bawk.

Dynamo lakah pawh a khel ṭha a, a goal khung hi mual vei lam sir aṭanga mawi zeta a thlawh luh a ni. Mahse, Sane chuan, "Khatianga goal khung tum kha ka ni lo a, ball ṭha tak cross tum ve mai ka ni - chutiang em emin ka thiam lo," tiin inkhelh zawhah a sawi a, a inngaitlawm hle.

Bayern goal thumna khungtu Gnabry-a'n match 10-ah goal li khungin assist vawi thum a nei tawh a, minute 79-naa Lewy thlaktu Choupo-Moting hming lam rik loh a harsa viau bawk. Season hmasaa match 32-a goal kua khungtu striker hian tun season-ah match riat khelin goal sarih a khung ta a, assist vawi thum a nei bawk.

Coach thar Julian Nagelsmann hnuaiah Bayern hian inelna hrang hrangah match 10 khel tawhin tlawm an la nei lo a, vawi kua chakin vawi khat draw result an nei - DFL-Supercup nomawi an chawi tawh a, Bundesliga leh Champions League-a an group-ah hma an hruai mek.