Sir Roger Hunt - Kop lunglai luahtu chu

September 27 khan Liverpool fans, ni lo, English football fans tih zawk tur a ni e - ni e, English football ngainatuten an hriat duh hauh loh thu thin ṭhawng an hria a, chu chu Liverpool legend Roger Hunt thih thu a ni.

Mi tam tak chuan, "Kum 83 a ni tawh a, a awm ve tawh alawm," an ti mai thei. Mahse, engtiklai mahin thihna hi a tuartu tan chuan, "A hun ve tawh alawm," tih ngawt theih a ni lo a, 'thih hun' a awm a rem lo.

Striker hmel fai tak, a kawr ban pawt chho chunga tlan reng ṭhin, taima fal em em, 'team player' tia an sawi ṭhin, goal khungtu ropui ni bawk kha a liam ta a, ngaihnawm ti taka a chanchin sawi mai loh chu tih theih dang a awm lo.

Liverpool fan-te chuan a hawihhawm leh zahawm em avangin, "Sir Roger Hunt," tih ngatin an ko ṭhin a, he kohna hi ani pawhin ngaihlu takin, "Knighthood ka mamawh lo a, Kop hoin 'Sir' min tih hi ka tan chuan a tawk a ni," a ti - Liverpool fans tan mittui tel loa thlah liam theih a nih in ring em ni?

Liverpool fapa
Kum 1958 khan Stockton Heath aṭangin hetihlaia Liverpool manager Phil Taylor chuan Anfield-ah Hunt a thlem lut a, Reds fan-ten an striker ropui ber pawl tur an lalut tih an inhre bik lo - September 1959-ah a match hmasa ber khelin Scunthorpe United an hneh ṭumin goal a khung nghal a, a bul ṭanna chauh a ni.

December 1959 khan Liverpool manager ropui leh hming dai tawh ngai lo tur Bill Shankly-a'n Taylor thlakin Reds enkawl hna a ṭan a, hetihlaia second division club hi first division-a hruai kir ngei a duh avangin a hna hmasa chu 'inṭhuahfai' a ni.

Shankly hian player awm sa 24 ngawt chu a chhuahtir a, mahse, a chhuahtir zingah Hunt erawh a tel ve lo. Kum 1962 a herchhuah meuh chuan first division-ah Reds an kir ta ngei a, Hunt hian top flight football-a an kir theih nan hian league match 41-ah goal 41 teh meuh a khung!

Hemi season-a Hunt leh Scottish striker ropui, Shankly-a'n Motherwell aṭanga a lakluh Ian St John te inkawp chu sawi hat an tling a, fan-ten ngaihnawm ti takin an chanchin an sawi a, hmuhnawm ti takin an inkhel an en ṭhin. August 22, 1964 khan Liverpool-in 3-2 a Arsenal an hnehna inkhelah volley hmangin goal a khung a, Match Of The Day - BBC2 football highlights programme thara goal khung lai chhuah hmasak ber a ni.

Liverpool & hlawhtlinna
Hunt hian Liverpool tan season 10 leh a chanve a khel a, a tira second division-a bul ṭanpuitu khan kum 1969-a a chhuahsan meuh chuan league match 404 khelin goal 244 a khung a, Reds tana ani aia goal khung hnem an awm rih lo.

Liverpool tan inelna hrang hrangah match 492 khelin goal 285 a khung a, club tana goal khung hnem lamah Ian Rush (346 goals) chiah a tluk lo. Merseyside club hi second division-a a champion pui bakah first division-ah vawi hnih a champion pui a, FA Cup leh FA Charity Shield (3) nomawi a chawipui bawk.

Mahse, Hunt hi Liverpool-ah a lawm a kim bik lo - kum 1965 khan European Cup semifinal-ah Inter Milan an ngam lo a, 1966 European Cup Winners' Cup final-ah Borussia Dortmund laka an tlawm bawk avangin European football-a nomawi hlawh chhuak lo chungin Liverpool a mangṭha.

Shankly-a'n kum 1969-a team dinthar a tum khan a ruahmannaah Hunt a telh lo a, a tawp dan a duhawm lo hle. March 1969 khan Anfield-a FA Cup fifth round-a Leicester City an ngam loh ṭumin Shankly hian a la chhuak a, a nungchang mawi vanga 'Sir' tih meuha an koh hian a kawr phelhin, chhuatah a paih tau a, fan-ten "Roger kan duh" tia au rualin a lam an ṭang zui. Mahse, December 1969 khan Bolton Wanderers lamah kaltir niin Reds-a a career duhawm tak chu a tawp.

World Cup nomawi
Liverpool hmelma club ṭantu, English football fan-te pawhin Hunt an ngainatna chhan langsar tak pakhat chu World Cup 1966 kha a ni - champion team England tan match ruk a khel kim vek a, goal thum a khung bawk.

World Cup 1966-ah khan England-in striker ropui tak tak an nei nual a, Hunt bakah Tottenham Hotspur legend Jimmy Greaves leh West Ham legend Geoff Hurst te an ni. Mahse, Hunt hi first choice ni chiang sa a ni a, Greaves leh Hurst chu buk lung an khaina a ni - a tirah Greaves nen an inkawp a, mahse, quarterfinal-a Greaves inhliam avangin Hurst nen an inkawpzui.

Greaves hi final-ah dam hman mah se khatihlaia England coach luhlul Alf Ramsey chuan Hunt leh Hurst inkawp tlangtir a thlang a, Hurst hian hattrick a siam zui - Hunt hian Hurst-a vul theih nan a thawhhlawk a, England captain Bobby Moore chuan, "Player-te tana player," tiin team tana a inpekna chu a fak hial.

April 1972-ah khan a hming chherna Liverpool chuan testimonial match an buatsaihsak a, hetihlaia mi 56,000 hi inkhel ṭan a nih hma darkarah a khat vek - England XI nen an inkhel a, ram tana World Cup nomawi a chawipui George Cohen, Bobby Moore, Nobby Stiles, Hurst leh Martin Peters te ho an khel. January 1969 khan ram tana inkhelh a chawlhsan a, match 34-ah goal 18 a khung hman.