Vaccine lak a ṭha - LeBron

Basketball legend LeBron James chuan amah leh a chhungte tan chuan Covid-19 vaccine lak chu thil ṭha a nih thu a sawi a, mi ṭhenkhatin la duh lo mah se James chuan invenna damdawi a lak thu a sawi.

October 30 aṭangin NBA season thar an khel ṭan leh dawn, basketball inelna sang ber hmachhawn tur hian hrileng laka invenna damdawi lak ngei ngei tur a ni hran lo, mahse khawpui ṭhenkhat thuneitute chuan an khawpuia inkhel tur chuan vaccine lak ngei a ngaih thu an sawi thung.

Tun dinhmunah NBA player zinga 90% chuan vaccine hi an la tling tawh, a la duh lo ṭhenkhat la awm mah se ruahmanna leh inbuatsaihna chu a kal dan pangngaiin kalpui reng a ni.

Kum 36 mi James chuan, "Midang chung-chang chu ka sawi thei lo, mahse ngun taka ka ngaihtuah bakah ka chhut hnuah kei leh ka chhungte tan chuan vaccine lak hi a ṭha, chuvangin invenna damdawi ka la," tiin a sawi.

NBA Most Valuable Player vawi li ni tawh hi season tharah Los Angeles Lakers tan a khel zui leh dawn a, a vawi nga nan NBA champion nih tumin thapui a thawh leh ang.