Djokovic chawl rih dawn

October 4 aṭanga khelh tur Indian Wells tournament-ah Novak Djokovic a inlan dawn lo, world number 1 hi inlan tura ngaih ni mah se inelna buatsaihtu lam chuan a tel loh tur thu an sawi chiang - a chhan tak erawh tarlan a ni lo.

Serbian star Djokovic chuan, "Indian Wells hi inkhelh nuam ka tihna hmun a ni a, thlalera inkhelh pawh ka châk hle. Mahse, kumin chu ka inlan thei dawn lo, nakkumah dam taka kan inhmuh theih zawk ka beisei," tiin a sawi.

Indian Wells-ah hian 2008, 2011, 2015, 2015 leh 2016 khan Djokovic hian hlawhtlinna a lo chang tawh a, sulhnu nei ṭha bik a ni; kumina a inlan thei lo tur hi inelna buatsaihtu bakah fans tan chuan channa lian tak a ni dawn.

Season hmasa khan hripui leng vangin Indian Wells hi an khel lo, kuminah erawh a hmuna entu awm chungin an khel dawn. Hmeichhe lamah Ashleigh Barty a inhnukdawk tawh bawk a, mipa leh hmeichhe number 1 an inlan dawn lo tihna a ni.

Tournament director Tommy Haas chuan, "BNP Paribas Open-ah Novak a inlan thei lo tur hi a pawi kan ti hle. Kan duhthusamah chuan player ṭha zawng zawng rawn inlan vek se tih a ni a, mahse a rem dawn ta lo," tiin a sawi.

Grand Slam vawi 20 champion tawh Djokovic hian tun season chhungin Australian Open, French Open leh Wimbledon title a la a, Tokyo 2020 leh US Open erawh a la thei ta lo.