Thla thum chawl tur Xhaka

Arsenal midfielder Granit Xhaka chu thla thum chhung a inkhel thei dawn lo. Tottenham Hotspur an hneh ṭumin Xhaka hi a khup a hliam a, endik a nih hnuah a chawlh chen tur a chiang - kuminah a hmel kan hmuh a rinawm ta lo a ni.

Switzerland captain hi red card hmuh vangin match thum hrem a ni a, hremna hmang zoin tun hnaiah a lo kir ve leh chauh. Hliam na tak a tawrh zui leh tak avangin atan season chanve chu a zo der tihna a ni ang.

Thu chhuah siamin Arsenal chuan, "Granit a hliam hi uluk taka endik a ni a, zai a ngai dawn lo hlauh. Amaherawhchu, a rei lo berah pawh thla thum vel tal chu a chawlh a ngai dawn, club chuan dam leh thuai turin duhsakna kan hlan," tiin a sawi.

Mikel Arteta nauten season bul an ṭan fuh lo, tun hnaiah erawh an insiam ṭha. An boruak ṭhat lai taka midfielder pawimawh inhliam hi channa lian tak a ni dawn, nipui bazar laia an lakluh Albert Sambi Lokonga chungah mawhphurhna a tla ang.