Chelsea ngam loh Federico Chiesa
Champions League champion lai Chelsea chuan beiseina sang tak nen Juventus mual Allianz Stadium an pan a, hnehna chan tumin an thawk chhuak - mahse a chhungah Federico Chiesa a lo awm si. English club hi an mikhualna ramah 1-0 in an chak lo.
Nilaini zan UCL group match inkhelah Old Lady chuan Chiesa goal khat hmangin Chelsea chu si khat faiin an hneh, point ruk hmuin group H hmahruaitu an ni. An hnuaiah hian point thum nei Blues leh Zenit St Petersburg an awm.
Goal khat a tawk
Serie A lamah che fuh hleithei lo mah se Champions League-ah Juventus an khawng tlat. Massimiliano Allegri nauten ball chang tam lo zawk viau mah se an tlarhnung a phui tlat - inkhel thununtu Chelsea lamin remchang an insiam hleithei lo.
Minute 46-naah Chiesa a inlar, Italy international hian Federico Bernardeschi hnen aṭanga a ball hmuh chu laklawh nei miah loin goal lamah a pet pawp - keeper Edouard Mendy rawn tlan hma deuh mah se a dang thei lo, chiang zetin a lut.
Bernardeschi-a'n Juve tan remchang nei mah se goal ruakah a khung ṭhelh a, hun tawp dawnah season hmasa UCL final-a goal awmchhun khungtu Kai Havertz chuan hnai tak aṭangin a tauh lut lo, tauh lut ni se goal dang luhna hun a awm tawh lo ang.
Harh ngai Blues
Premier League champion Manchester City lakah Chelsea an tlawm a, tunah chuan team talbuai Juventus lakah an tlawm chhunzawm. Thomas Tuchel-a nauten insiamṭhat an mamawh takzet - Old Lady lakah hian target zawnah vawi khat chiah an pet.
Tuchel-a'n danglamna beiseiin substitute panga - Ben Chilwell, Ruben Loftus-Cheek, Ross Barkley, Callum Hudson-Odoi leh Trevoh Chalobah te a hmang a, amaherawhchu keeper Wojciech Szczesny tan hna harsa an siamsak thei meuh lo.
Inter Milan striker hlui Romelu Lukaku chu club lian lakah a zawnin a 'nil' leh ta a, Belgium international hian a puitling tawh thu sawi mah se hmasawn ngaihna a la ngah. Inrinni zana Southamton an mikhual hunah chuan goal an khung tawh ngei a rinawm.
Eng nge an sawi?
Juve manager Max Allegri chuan, "Thlipui tleh karah pawh lawngpu ṭha mi chuan kawng a hre ṭhin, chutiang chiah chuan European champion lakah khan player ten an khel. Harsatna hrang hrang karah team ṭha hneh dan an hria.
"UCL match hnihah point ruk kan hmu, goal kan chhuah lo bawk," tiin a naute khelh danah a lungawi a. Striker Alvaro Morata leh Pablo Dybala te inlan thei lo mah se Bernardeschi leh Chiesa ten an hna an tlin thu a sawi bawk.
Chelsea manager Tuchel chuan, "Ball chang hnem chunga goal kan khung lo kha a pawi, goal hmaah kan hriam tawk lo a ni. Kan khelh dan phung pangngai angin kan khel thei lo kha a pawi, kan taksa ai mahin kan rilru lam a hah niin ka hria," a ti a, insiamṭhat an ngaih thu a sawi bawk a ni.