UCL aṭangin Inter Milan an tla?

Real Madrid lakah Inter Milan an tlawm a, Italian club hian knock out round luh beiseina la nei ve mah se kawng a zim tawh hle. Zinedine Zidane-a naute erawhin group B-ah pahnihna dinhmun an luah.

Nilaini zan inkhelah Inter hi Real lakah 2-0 in an tlawm, chawlhlawk hman hmain Inter midfielder Arturo Vidal chu hnawhchhuah a ni a, player kim loa khel Antonio Conte enkawl team hi an tho chhuak thei lo.

Group B inkhel dangah Borussia Mon-chengladbach chuan an mikhual Shakhtar Donetsk 4-0 in an sawp. German club hian point riat hmuin hma an hruai, an hnuaiah hian point sarih neitu Real an awm thung.

San Siro hi mikhual tana lenluh chakawm lohna ṭhin a ni, tun hmain Real Madrid meuh pawhin hnehna an la chang ngai lo. Tun ṭumah erawh thawnthu ziah danglamin a awm ta.

Minute sarihna lekah Eden Hazard chuan penalty aṭangin goal hmahruai a khung, keeper Samir Handanovic tan dan theih a ni lo. Spanish team lamin ball chang tamin inkhel an thunun zui.

Inter-in minute 33-naah penalty hmuh an beisei, an beisei ang pek an nih loh vangin referee Anthony Taylor an bawr laih. English mi Taylor hian che uchuak bik Vidal chu yellow card pakhatna a pe.

Chile international hi a card hmuh vangin a lungawi lo, a hma a player awmte nem sawnin referee chu hmai chhanah a ṭawngkhum zui a, yellow card pahnihna pek a ni zui bawk. Player tlem zawk Inter tan thawhchhuah a harsa tawh a, defender Achraf Hakimi-a'n an mahni lamah a tih luh bawk avangin tih theih a awm tawh lo.

Inter Milan hian kumin UCL-ah chak ni hmel an la hmu lo, point hnih chauh hmuin table mawngphah luahtu an ni. Italian club hian 2012 hnu lamah knock out satge an la lut leh lo a, an record chhe tak hi an thai reh rih dawn lo niin a lang.

Inter coach Conte chuan, "Penalty bakah red card a awm avangin inkhelh kha a harsa hle a ni. Real kan hmachhawn aṭang hian thil tam tak kan zir chhuak, inkhelah rilru zawng zawng sen a ngaih bakah tihsual zeuh neih a thiang lo tih kan hre thar," a ti.

Real manager Zidane chuan, "Hnehna chan kan phu, ka naute khan theih tawp tak meuh an chhuah vek vanga hnehna chang thei kan ni. A tir aṭanga a tawp thleng khan rilru ka pe, hnehna chan hi kei leh ka naute tan a pawimawh," tiin a sawi.

Goal khungtu Hazard chungchang sawi zuiin Zidane chuan, "Goal khung a mamawh, tun hma lama ṭha taka a khelh anga khel chhuak leh turin ka duh. Theihna nei sang bik leh player ṭha bik a nihna a lang chhuak leh ngei ang," tiin Belgium international lakah beisei a nei sang.