Anfield-ah Man City fiahin an awm dawn
Premier League kartawp inkhel nghah man a awm leh dawn - Pathianni zan dar 9:00-ah hmahruaitu Liverpool chuan Manchester City an mikhual dawn.
Manchester City hian Premier League-a an elpui Chelsea an hneh thei a; nimahsela Champions League-ah Paris St-Germain an hneh lo. Anfield-ah City hi fiahin an awm dawn.
City hi tun hnaiah an fixture a hautak hle. Khualmualah 1-0 a Chelsea an hneh hnuin Paris khawpuiah Paris St-Germain an lenchilh leh a, si hnih phurin an haw.
Duh ang thala insiamremna hun pawh an neih hmain City hian Liverpool an lenchilh zui leh dawn. Pep Guardiola leh a naute tan a harsa dawn. Chutihrual chuan City squad chhah thu sawi a ni fo a, a chhah tawk leh tawk loh nak zanah a hriat ang.
Liverpool hi khualmualah nuamsa taka FC Porto (5-1) hneh zo hlim an ni a, an phur vanglai tak a ni - Anfield-a team pahnih intawn hnuhnung berah City hi 4-1 ngawtin an chak tih erawh hriat a ṭha.
Klopp-a huaisenna
Liverpool-in rin loh takin an league match hnuhnung berah Brentford chu 3-3 in an inhnehtawkpui a, Premier League kaithar team an hmachhawn hma zawnga goal khat chiah chhuah team hi 'nek fuh' chuan an tlarhnung a pawp thei tih a lang chiang.
Reds-in league hnuchhawnin Champions League-ah Porto an lenchilh zui a, City nena an inkhel tur thlirin Reds manager Jurgen Klopp-a'n player a rawn siksawi nual rin ni mah se a first choice hlang deuhthawin a rawn khel mauh!
Inkhelh zawhah Klopp-a'n, "Brentford laka kan buaina kha player ngai bawka chinfel ka duh a ni," tiin 'direct football' hmanga Brentford-in an rum ṭhaihna chu siamrem a duh vang niin a sawi a, goal ngain a nauten an chhang lêt.
Klopp-a'n an result hnuhnung ber avangin a naute a ring tawk sawt ang tih a chiang a, chutih rual chuan hliam vangin Trent Alexander-Arnold leh Thiago Alcantara-te a chhawr thei dawn lo a, player pahnih theihna enin anni inlan thei lo tur hi thil pawi a tling.
Engtin nge?
Reds-in tlarhmaah Mohamed Salah, Sadio Mane, Roberto Firmino leh Diogo Jota a nei a, duhthlan tur an nei ṭha. Klopp-a'n dan pangngaia 4-3-3 a hmang dawn a nih chuan Jota leh Firmino inkarah buk lung a khai ang a, Mane leh Salah erawh lut chiang tura ngaih an ni.
Season hmasaa Etihad Stadium-a an intawn khan Klopp-a'n 4-4-2 formation a hmang a, tlarhmaah Salah leh Firmino awmin wing-ah Jota leh Mane an awm a, Salah leh Firmino ten City midfield an tibuai thei chiah a, 1-1 in an inhnehtawk.
Anfield-a an inkhelah erawh Klopp-a'n 4-3-3 a ring a, 4-1 in an tlawm. Mahse, he inkhelah hian centre back-te inhliam avangin Fabinho leh Jordan Henderson chu tlarhnung laiah an ding tih kan la hre awm e.
Brentford lakah 'direct football' vangin Liverpool an buai a, he inkhel entu Porto-in he system hmang tho hian Reds lo rum ṭhaih ve tum mah se an hlawhchham a, Klopp-a'n an buaina a chingfel nia a inngaih avangin inrintawkna nen City a mikhual dawn.
City & Pep
City fixture a hautak a, Pep-a'n tlarhma lamah player siksawi zeuh zeuh mah se Chelsea leh PSG an hmachhawnna inkhela tlarhnung erawh a ngai - Kyle Walker, Rúben Dias, Aymeric Laporte leh João Cancelo-te a ring tlang ve ve.
Chelsea lakah hlawhtlinpui mah se PSG lakah erawh an mualpho a, an hmachhawn leh tur hi Mane, Salah leh Jota/Firmino inkawp a nih dawn bawk si avangin Spanish manager-in a ngaihtuahna a sen thar a ṭul dawn.
City tlarhnung phui ṭhin chhan langsar tak pakhat chu tlarhma player-te an ni a, tlarhma lamin an nawr nat ṭhin avangin ball kal dan tur defender tan hriatthiam a awlsam ṭhin - anmahni ang thoa nawr na ṭhin Liverpool an hmachhawn tawh dawn thung.
Pep-a'n PSG lakah tlarhmaah Jack Grealish, Raheem Sterling leh Riyad Mahrez a inkawptir a, a tifuh lo tih a pha lo - 4-3-3 bawk a hmang nawn dawn a nih chuan Sterling leh Mahrez bench-ah dahin, Gabriel Jesus leh Phil Foden chu Grealish-a kawppui turin a rawn luhtirtawh mai ang em?.
Liverpool buaina
City-in Chelsea an hneh khan mual vei lama Grealish leh Cancelo chu Blues talbuaina a ni a, Liverpool-in Arnold an chhawr theih dawn loh avangin anni hmachhawn tur hian James Milner a din a rinawm. A kum a tam ve tawh avangin helai hi Liverpool buaina tur a ni thei.
Arnold a awm chuan tlarhnung a veng satliah lo a, Liverpool attacking system-ah nasa takin a inrawlh a, hei hian mual vei lama an khingpui team-in an nawr na tur thlengin a veng thei - Milner hi Arnold anga hnathawk thei tura beisei a harsa.
Klopp-a'n Brentford laka a chet chhiatna a siam rem viau tawhah inngai mah se an hmachhawn kha Porto an ni a, fiahna tak tak anga sawi a rem lo.
Hei vang hian Pep-a'n tlarhnung aṭanga passing game hmanga nawr aiah Liverpool buaina hre renga 'direct game' a rawn khel thut a nih pawhin a mak lo ang.
Tlarhnungah keeper Ederson-a ball sem, pet chhuah leh vawm chhuah thlengin a ṭhatzia kan hriatsa a ni a, he Brazilian keeper ball pet hmanga Liverpool nawr tura Ferran Torres emaw Sterling an lut thut a nih pawhin mak ti suh.
Inkhel pawimawh a ni a, chumi piah lamah inkhel hmuhnawm tak a nih a beiseiawm bawk.