Durand Cup final-ah Mohammedan Vs Goa

Asia rama inelna upa ber Durand Cup final chu October 3, Pathianni zan dar 6:00 hian Salt Lake Stadium-ah khelh a ni dawn a, ISL club FC Goa leh Kolkata club ṭha Mohammedan te an inhmachhawn dawn. Sony Ten 2-ah a en theih ang.

Mohammedan hian quarterfinal-ah Gokulam Kerala 1-0 in an hneh a, semifinal-ah Bengaluru United chu extra time khelh hnuah 4-2 in an hneh. FC Goa hian semifinal lut turin Delhi 5-1 in an sawp a, final lut turin hun pangngaiah Bengaluru nen 2-2 a inhnehtawk hnuah penalty shootout-ah 7-6 in an chak.

Kolkata club-ah hian Mizo player panga - keeper Zothanmawia (T. Mawia), defender pahnih Lalramchullova leh Lalramhmunmawia (Tea), midfielder Malsawmzuala bakah forward Brandon VL Remdika te an awm. Aizawl FC winger hlui Brandon hian semifinal-a Bengaluru United an hneh ṭumin goal pawimawh bik a khung.

Goa-ah defender Lalhmangaihsanga (Papuia) a awm a, Armed Veng South tlangval hi match zawng zawngah bul la ṭan vekin Bengaluru an hneh ṭumin penalty a pet goal. Durand Cup final-ah Indian club ṭha pahnih an inkhel dawn a, Mizo tlangval ten hmun pawimawh an chang ang.