Man United hmaah Everton
Manchester United-in vawiin tlai dar 5:00 hian Everton an mikhual dawn a, Ole Gunnar Solskjaer-a hote hian an match hnuhnung berah Aston Villa an hneh loh avangin insiamṭhat an mamawh hle.
Ole-a hote hian Champions League-ah Europa League final-a an hneh loh Villarreal lakah phuba an la a, injury time-ah Cristiano Ronaldo-a‘n goal a khung. Portugal captain bawk hi Man United hmachhuan tur a ni dawn a, chutihrualin Yellow Submarine nen an inkhelh ṭuma thawhrim vanga mipui lawm hlawh Edinson Cavani pawhin khelhna hun a neih a rinawm.
Tlarhnungah captain Harry Maguire a la tel thei dawn lo a, Luke Shaw dinhmun a la chiang lo. Amaherawhchu Champions League-a hrem vanga inlan thei lo Aaron Wan-Bissaka a khel thei tawh dawn a, mual ding lam pawp zualpui chu a phui thei ang.
Man United buaina tak erawh midfield a ni a, Solskjaer-a hote hian eng club pawh hmachhawn se inkhel an thunun thei ṭhin lo. McFred hminglem an pek Scott McTominay leh Fred te an inkawpin a fuh tawk lo a, Tominay leh Paul Pogba te an awm pawhin an inkawp rem chuang lo. Norwegian manager hian player nei ṭha mah se a naute hi an theihna angin an la khelh chhuahtir lo.
Everton hi manager tawnhriat nei Rafael BenÃtez enkawl a ni a; Man City, Chelsea leh Man United te ang thoin point 13 an hmu mek. Striker pawimawh Dominic Calvert-Lewin-a‘n training a zawm tawh a, amaherawhchu Old Trafford-ah a la inlan theih hmel lo a, Brazilian forward Richarlison erawh Man United hi a hmachhawn theih a rinawm thung.