Arteta-a'n Ben White a ringtawk

Arsenal manager Mikel Arteta chuan a defender Ben White a rintawk thu a sawi. England international hi hun rei lote chhunga a insiamrem chho thei mai chuan a tih lawm thu a sawi chhuak tel bawk.

Premier Legaue khel turin Gunners hian zanin dar 10:00-ah Brighton & Hove Albion an hmachhawn dawn. Pound maktaduai 50 man White-a'n a club hlui a hmachhawn lehna hmasa tur a ni a, a lakah mipui mit a fu ang.

Arteta chuan, "Euro aṭanga an lo haw hnu khan mi tam takin eng tin nge a khelh dawn tih an ngaihven tawh, sum tam tak senga kan lei a nih avangin boruak pawh a tam. Mahse, ka beisei aiin a talbuai lo.

"Hun rei lote chhungin Arsenal khelh dan phung a man thei mai a, hmasawnna tur tam tak chu la nei mah se ṭha taka kan thawhho theih mai avangin a lawmawm," tiin a sawi.

Kum 23 mi White hi Arsenal tlarhnungah Gabriel nen an inkawp rem ta hle, tun hnaiah khel ṭha dun viau mah se Arteta chuan anni pahnih tlarhnung laia "first choice" an la nih bik loh thu a sawi, player dangte nen khelhna hmun an la inchuh reng.

Premier League match thlir lawkin Arteta chuan, "Brighton hi team ṭha tak an ni, an phu ang ngeiin point pawh an hmu tam tawh. Tun hma lama kan intawn tawhna te dahṭha in, tun season kan inkhelh tur chauh kan ngaihtuah ang," a ti.

Gunners hian kar hmasa khan Tottenham 3-1 in an hneh, tun season bika an player dam kim ṭum awmchhun tia sawi theih a ni. Tunah chuan hliam vangin Granit Xhaka an chhawr thei dawn leh tawh lo - Thomas Partey chungah mawhphurhna a sang zual ang.