Barca hmabak Atletico; buaina erawh Koeman

Zanin dar 12:30-ah La Liga match hmuhnawm en tur a awm dawn a, Atletico Madrid chuan tun hnaia che chhe tak Barcelona an mikhual dawn a, en loh phal chi a ni lo.

Mahse, tun dinhmunah Barca leh Atletico inkhel tur aia ngaihven hlawh zawk a awm a, chu chu coach Ronald Koeman-a chanchin a ni - Catalan club chuan Koeman ban dan tur hi an ngaihtuah nia sawi a awm!

He thuziak i chhiar meuh chuan Koeman hi an ban fel tawh hial mai thei. Dutch coach hi ban hman lo pawh ni se hrem vangin zaninah Barca a ho thei dawn lo hrim hrim a, technical area-ah a awm ve a rem dawn lo.

Spanish media-ten an tarlan dan chuan Barca hian Atletico hmachhawn hma law lawa Koeman ban a nih dawn leh dawn loh an ngaihtuah a, tuna an buaina chu - "Koeman kan ban ang em?" tih ni loin, "Engtikah nge kan ban ang?" tih chu a ni zawk.

Second choice
Kan Mizo thufingah meuh, "Duh loh nena khuangchawi ai chuan..." tih a awm a, duh lohte chu eng anga ṭha pawh ni se hmuh ṭhat luih an har ṭhin. Joan Laporta-a'n Barca President hna a chelh thar leh khan a lo hmuaktu chu a duh loh Koeman a ni a, mahse, sum an neih loh miau avangin duhthlan tur dang a awm lo.

Coach banin ken tel tam tak a nei. Sum neih loh vanga inchingfel mek Barca hian Koeman an ban a nih chuan zângnadawmna an pek a ṭul dawn a, coach thar rawihnaah sum tam tak sen a ngai dawn bawk.

Mahse, sum neih loh vanga an chelh hram hram Koeman hian result hmangin amah hmangaih lo chunga khuang a chawipui theih beiseia dawhtu Laporta lawmna a thlen thei lo a, tunah chuan an ban dawn ta.

Spanish football expert Guillem Balague chuan, "Koeman an ban thu hre tur hian rei kan nghah a ngai tawh lo ang. Lisbon aṭanga Barcelona an rawn kir hnuah Barca thuneitute an inhmu khawm a, airport aṭanga hnaitê training ground-ah kal nghalin ruahmannate an siam a ni," a ti.

Buaina chu
Laporta-a'n Koeman-a duh lo sa a, result a la nei chhe zui! Match thum zet a zawna an chak zawh loh hnuin kar hmasa khan La Liga-ah Levante chu 3-0 in an sawp a, an phur dawn chauh emaw tih hnuah Benfica-in Champions League-ah 3-0 in an lo sawp zui!

Koeman lah pa inthlahrung lo tak a ni a, inkhelh zawhah Dutch coach hian a player-te rinna a la neih reng thu a sawi a, thuneitu lam a kap zui bawk. Kum 58 mi coach hian season hmasaa an lan mawi chhan pawh sum neih loh vanga an chhuahtir tak Lionel Messi a nih thu huai takin a sawi mai a, a thusawi hi amah chhawrtu tan chuan pai a nuam lo ṭhin ang.

Catalan club hian La Liga-ah match ruk khel tawhin parukna an ni mek a, tlawm la nei lo mah se vawi thum chiah an chak a, vawi thum an khingpui an inhnehtawkpui - tunah Atletico Madrid-in an hmuak a, hmabak a êng lo takzet.

Champions League-ah vawi hnih an khel tawh a, goal ruk an chhuah a, an la khung ve lo thung. Tun dinhmun aṭanga teh chuan Europa League lam mitthlapui mai a awl a, Europa League leh Barca hi a inhmeh thei dawn lo.

Coach tur
Koeman ban a ni ngei dawn a, zawhna awm chu tuin nge a hmun ruak luah ta ang, tih hi a ni a, tun dinhmunah chuan Belgium coach Roberto Martinez hming a ri ring viau. Everton boss hlui hi Johan Cruyff ngaisangtu a ni a, hei tak hi Barca-in an duh chhan nia sawi a ni.

Chutihrual chuan nakkum maiah World Cup khelh tur a awm dawn a, hei hi thlir chuan Martinez tan Belgium chhuahsana Barca tluchhe mek pan hi a harsa mai thei. River Plate coach Marcelo Gallardo pawh sawi rik a ni a, mahse, Argentine club hi season laklawha chhuahsan a duh lo niin an sawi.

Spain coach Luis Enrique-a'n an ram team-a a contract neih lai a zah thu a sawi a, Barca legend Xavi pawh an lam ri. Mahse, Laporta chuan Xavi hi inchher phawt a la mamawhah a ngai niin an sawi a, Balague chuan, "Fans leh media ten Xavi hi an ngaina a, club a hrechiang a, sumah a buai lo bawk ang," a ti.

Chutihrual chuan Martinez emaw Xavi emaw pawh hi sawm chhuak dawn se Barca hian anmahni ruaitu hnenah pawisa an pek a ṭul dawn a, free agent Antonio Conte leh Andrea Pirlo hming a rik tel avangin leichhuah ngai lo coach lam an hawi mai thei.

Atletico chu
Coach ban leh ban loha an buai laiin Atletico erawh Catalan club hmachhawn turin an inbuatsaih a, Champions League-a chak hlim an nih bawk avangin La Liga-a an match hnuhnung bera an tihsual thup nan he inkhel hi hman an tum ang.

Atletico hi table-ah palina an ni mek a, hmahruaitu Real Madrid nen match sarih ve ve khel tawh mah se point thumin Real hi an phak lo mek - an league match hnuhnung berah khan Alaves chu 1-0 in an ngam lo.

Mahse, Champions League-ah Barca duh loh Luis Suarez leh Antoine Griezmann goal hmangin Atletico-in AC Milan an hneh a, player pahnih hian an rilru ti natu Catalan club lakah hian phuba lak an châk dawn.

Suarez chuan, "Ka hun tawp lamah khan keimahin min training tir a, professional ka nih avangin ka ngawi mai a ni. Mahse, midang chunga kan tih ang hi kan chungah a thleng ve leh ṭhin," a ti a, hun rei tak a lo khelh tawhna Catalan club-in a hun tawp lama an enkawl dan a la theihnghilh bik lo.