PSG leh Messi inlan hun

Kartawp Ligue 1-ah Paris Saint-Germain an inlan dawn a, Pathianni tlai dar 4:30 hian Rennes khelmualah an leng dawn. Champions League-a Manchester City hneh hlim club hi chak tura beisei an ni.

PSG hian Ligue 1-ah match riat khelin point 24 an nei tawh a, an la chak fai vek! An lenchilh tur Rennes hian match riatah point kua an nei tawh thung a, team pahnih inthlauh dan enin inkhel en châkawm a ni lo - mahse, Lionel Messi chu PSG tana inlan tura beisei a ni a, Argentine forward hmuh châkin khawvelin he inkhel hi a thlir dawn.

Messi-a'n PSG a pan hnuah French football-ah minute 100 bak a la khel lo a, goal pawh a la khung lo. Mahse, Champions League-a 2-0 a City an hneh ṭumin Messi hian goal mawi bik a khung a, a hunah tak a ropuina a pholang.

Argentine forward hian inkhelh zawhah, "Ka team tharah ka tlangnel chho a, zawi muangin ka teammate-te nen pawh kan inman zel a ni," a ti a, Messi thusawi hi an khingpui tur tan thu hriat nuam a ni dawn lo.

PSG hian Messi bakah Neymar leh Kylian Mbappé an kawl bawk a, anni pathum inkawp hi khawvelin a ngaihven. Chutihrual chuan player pathum hi City nena inkhel hautak hmachhawn zo hlim an nih avangin coach Mauricio Pochettino-a'n a rualin a luhtir lo ve thei bawk.

A tawi zawnga sawi chuan player pathum hi lut rual lo pawh ni se Rennes tan chuan PSG an la ṭha hret a, point thum hmuh a beiseiawm loh.