Clijsters leh Murray tan wildcard

Mipa leh hmeichhe tennis world number 1 hlui pahnih - Andy Murray leh Kim Clijsters te chu Indian Wells-a khelh tur BNP Paribas Open buatsaihtute chuan duhsak takin wildcard an pe.

Grand Slam vawi li champion tawh Clijsters hian hun rei tak tennis a chawlhsan hnuah a lo kir leh a ni a, fa a neih tawh avangin a vanglai ang chu a ni thei tawh lo - vawi hnih a champion tawhna hmuna a inlan tur hi a phur ang tih a chiang.

Mipa lamah Grand Slam vawi thum champion tawh Murray pawh a inlan dawn. Britain star hi hliam vanga hun rei tak chhung buai tawh a ni, singles huangah phei chuan beisei a sang lo; mahse player langsar leh lar a nih miau avangin duhsak a hlawh hi a mak lo.

Tournament buat-saihtu lam hian US Open champion Emma Raducanu pawh wildcard an lo pe tawh, player langsar ṭhenkhat inlan thei dawn lo mah se inelna hlawhtling tak an buatsaih theih ngei an beisei.

Mipa leh hmeichhe number 1 ni lai Novak Djokovic leh Ashleigh Barty te an inhnukdawk fel tawh. Anni pahnih hma hian Rafael Nadal, Roger Federer, Serena Williams leh Naomi Osaka te pawh an inlan dawn lo tih a chiang tawh bawk.

Season hmasa kha hripui leng vangin WTA & ATP Masters 1000 event hi an khel thei lo, tun season atan chuan October 4-17 chhungin an khel ang - a hmuna entu an awm thei dawn a ni.