Leicester City an che fuh thei rih lo
Premier League team hmuhnawm ni phak ṭhin Leicester City chu Europa League lamah an che fuh thei rih lo - Foxes hian group match vawi hnih an khelh tawhah chak ni hmel an la hmu lo, knock out stage luh a harsa tawh dawn.
Ningani zan group C inkhelah Foxes hi Legia Warsaw mualah 1-0 in an tlawm. Brendan Rodgers-a naute hi an match hmasa zawkah Napoli nen 2-2 a an inhnehtawk bawk avangin, match hnih khelh tawhah point khat chauh an la hmu.
Foxes an tlawm
Team pahnih sulhnu leh player neih dan thlir chuan Leicester hi chak tura rinkai an ni. Mahse, English club hian an striker ṭha ber Jamie Vardy chu bench lama dah chungin inkhel bul an ṭan a, goal hmaah an hriam tawk lo.
Minute 31-naah Azerbaijan international Mahir Emreli chuan amah vengtu Daniel Amartey paltlangin goal awmchhun a khung - keeper Kasper Schmeichel tan dan theih a ni lo, hnai taka an lama goal lut lai a thlir.
Second half-ah defender Jannik Vestergaard-a'n si phurh sut theihna remchang a hmu, mahse yard li leka hnai aṭanga a ball tauh chu Legia goalkeeper Cezary Miszta-a'n rin loh takin an lo dang hman, goal an venhim miau avangin point thum an hlawh chhuak.
Napoli chak lo
Serie A lamah match an khelh apiangah an chak vek - Europa League lamah erawh Napoli tan result ṭha neih a harsa. Italian club hi an mikhual Spartak Moscow lakah 3-2 in an tlawm. Group C aṭanga tlang tura rinkai Leicester leh Napoli ten point khat ve ve chauh an la nei tihna a ni.
Luciano Spalletti naute hian minute khatna lekah Elif Elmans hmangin goal an nei hmasa, mahse mikhual lamin Quincy Promes-a goal hnih leh Makhail Ignatov-a goal hmangin an chhang let a, hun pek belha Victor Osimhen goal khungin Naples team a chak lo.
Italian team leh Russain club inkhel hi a boruak a sang, yellow card ringawt pawh vawi 12 phawrh niin, team pahnihin an player pakhat ve ve chu red card vangin an chan bawk - minute 90 hnuah pawh minute 11 zet pek belh a ngai hial.
West Ham 100%
West Ham manager David Moyes-a'n krismas hnuah pawh Europa League khelh zel a duh thu a sawi tawh, a awmzia chu group stage chauh ni loin kock out stage luh ngei a duhin a tum bawk tihna a ni - a tum a hlawhtling dawn niin a lang.
London Stadium-a inkhelah Hammers hian Declan Rice leh Said Benrahma te goal hmangin an mikhual Rapid Vienna 2-0 in an hneh, match hnih an khelh tawhah chak ve vein point ruk an hmu; group H-ah chuan English club chauh hi vawi hnih chak thei an la ni.
Moyes chuan, "European football kan ngai pawimawh, kan theihna zawng zawng kan hlan. Chutih rualin Premier League pawh kan ngaih pawimawh a ngai, uluk leh fimkhur tak chunga player siksawi pawh a ngai reng a ni," tiin a sawi.