Sturridge-a'n Australian club a zawm

Liverpool leh England striker hlui Daniel Sturridge chuan 2021-22 season atan Australian club Perth Glory a zawm a, kum 32 mi hian March 2020-a Turkish club Trabzonspor a chhuahsan hnuah club a nei lo.

Sturridge chuan, "Chona thar hmachhawn tura hun ṭha ka nei hi ka lawm hle. Club thar tan theihtawp ka chhuah dawn a, season tawpa kan dinhmun aṭangin kan hnathawh chu a teh theih ang," tiin A-League a khel tur chu a lawm thu a sawi.

Glory neitu Tony Sage chuan, "Daniel hi Glory club history-a player ropui ber a ni ringawt lo a, A-League history-a player ropui ber a ni," tin an player thar hi a chhuan thu a sawi.

Sturridge hian Liverpool tan season ruk leh a chanve khelin match 160-ah goal 67 a khung a, 2017-18 season chawhnu lamah loan hmangin West Brom a zawm. Kum 2019 khan Trabzonspor hi a zawm a, inelna hrang hrang match 16-ah goal sarih a khung sak. England tan pawh Sturridge hian match 26 khelin goal riat a khung.