Hma kan sawn - Jose Mourinho

AS Roma manager Jose Mourinho chuan Serie A lamah che buai deuh mah se, tun hnaia an match hnuhnung berah hmasawnna a hmuh thu a sawi. Roma hian Ningani zan Europa Conference League-ah Zorya chu 3-0 in an hneh.

Mourinho chuan, "Goal thum khung a, mahni lama lut ve miah lo chu result ṭha tak a ni. Hmanni lawkah kha chuan, inkhel thunun tak chung siin a chak lo zawkah kan ṭang, tunah chuan kan duh ang ngeiin hnehna kan chang ta," tiin a sawi.

Roma hian season bul an ṭan fuh, mahse Serie A match an khelh hnuhnung pathum zinga pahnihah an tlawm - Lazio nen an inkhelh ṭum phei chuan goal hnih an chhuah hmasa a, si phurh sut zo mah se hun tawp dawna goal an chhuah leh an tuar.

Portuguese manager hian club hrang hrang a enkawl tawhnaah tlarhnung a ngai pawimawh ṭhin. Roma din thar leh a tumna kawngah pawh hian a ngai pawimawh dawn tih a chiang a, ho lam taka goal chhuah a ngai-thei lo ang.

Roma hian Pathianni zan dar 9:30-ah Empoli an mikhual zui leh dawn, champion an tum a nih chuan point hloh loh a pawimawh tawh ang. Mourinho chuan an inrintawkna an neih let leh tawh thu a sawi.

Mourinho chuan, "Empoli hi team ṭha an ni, league match vawi ruk aṭangin point kua an hmu thei. An thawkrim em em a, ni khata vawi hnih training neih chang pawh an nei, rilru paukhauh leh inpumpek mi an ni," tiin an khingpui tur team a fak, a naute chesual lo turin a fuih ngei ang.