Final ang mai a ni ; Zaninah Real Madrid Vs Bayern Munich
Kumin UEFA Champions League final chu Ukraine khawpui Kiev-ah May 26 zanah khelh a ni dawn a, zanin dar 12:15-a khelh tur hi semifinal ni mah se nomawi inchuh zan ai maha hmuhnawm tura ngaih a ni.
Santiago Bernabeu-ah Bayern Munich an lenglut dawn a, Real Madrid an hmachhawn dawn. Champions League nomawi vawi 12 chawi tawh leh inelna hnuhnung pahniha champion Los Blancos hian khualmualah 2-1 a hnehna an chan avangin an dinhmun a ṭha a, amaherawhchu kum sarih chhung Bundesliga-a nomawi chawi tawh Bavarians hian inlehthalna thlentir turin an squad a ṭha tawk.
Thlirletna
Allianz Arena-ah Bayern-in bul an ṭan ṭha, amaherawhchu inhliam vangin Jupp Heynckes kut phuarin a awm a, Jerome Boateng leh Arjen Robben te chu first half-ah inhliam vangin lakchhuah an ni a, Bavarians in an tuar tih a chiang.
Bayern hian Joshua Kimmich hmanga goal an khung hmasa chungin an humhim thei lo a, Real-in Marcelo leh Marco Asensio te goal hmangin an lehthal. Los Blancos hian khualmualah goal hnih an khung theih avangin 1-0 a an chak lo a nih pawhin 'away goal rule' hmangin final an lut tho ang.
Alaba a dam
Jerome Boateng tan tun season-a inlan hman a beiseiawm tawh lo a, World Cup khelh theih chu a beisei phak tawk a ni tawh. Dutch winger Robben pawh a dam hman loh avangin squad-ah a tel lo a, Bavarians tana chanchin ṭha chu first leg khel thei lo David Alaba a dam tawh.
Bayern boss Heynckes chuan kartawpah player a hahdamtir a, Eintracht Frankfurt chu 4-1 in an hneh tho. Hemi ṭuma goal khungtu kum 20 mi Niklas Dorsch chu tum ṭumah hian squad-ah dah tel a ni.
Isco a chiang lo
Real pawhin first leg-ah Isco an la chhuak a, Spanish midfielder duhawm hian nimin training zawm tawh mah se a inlan dawn a nih chuan 'pain killer' hman a ṭul dawn a, hliam belhchhah theihna tur a nih chuan Zinedine Zidane-a'n a chhawr luih ngam a rinawm loh.
First leg-a chhawr loh Gareth Bale erawhin Leganes 2-1 a an hneh ṭumin goal a khung a, Zidane chuan, "Bale a khel ṭha a, tuna a khelh dan ang hian a khelh zel a ngai. Chutihrualin Bayern nen inkhel bul a ṭan dawn tihna a ni lo," tiin a sawi.
Engtin zel?
Bayern boss Heynckes chuan Real Madrid chu hneh theih an nih thu a sawi tawh a, final thlen beiseina nei chunga Santiago Bernabeu an pan tur thu a sawi a. Bavarians hian Real Madrid an hmachhawn hnuhnung pangaah an hneh lo vek a, amaherawhchu infuihphurna tur an nei a. Kum 2012 khan Heynckes-a ho hian Santiago Bernabeu an tlawh a, penalty shootout-ah hnehna changin final an thleng a, an champion zui bawk.
Amaherawhchu Bayern hian hnehna an chang dawn a nih chuan Robert Lewandowski, Thomas Muller, Franck Ribery leh James Rodriquez te an chet ṭhat a ṭul dawn a, tlarhnungah Boateng aia lut tur Niklas Sule mawhphurhna a sang ang.
Real Madrid pawhin hmabak an la nei tih an hria a, Zinedine Zidane chu hrechiang bertu a ni. Los Blancos boss chuan, "Inkhel hautak zet kan hmachhawn dawn. Hei vang hian ka player-te pawh tun hma zawng aia ṭhaa khel turin ka ngen a, a chhan chu final thlen ka duh vang a ni," tiin final thleng tura an dinhmun la ṭhat tawk loh thu a sawi.
Spanish club tan Cristiano Ronaldo bawk chu hmachhuan tur a ni a. First leg-ah Portugal captain hi dah ṭhatin a awm mah se Champions League-a goal khung hnem ber record neitu hian Santiago Bernabeu-ah January 13 aṭang khan goal a la khung ziah a, match kua a khelh aṭangin goal 18 a khung a, ven uluk a ṭul ang.