Goal 100 khung tling thei Man City
Pep Guardiola kaihhruai Manchester City chuan Premier League season kal laiah goal 102 an khung tling ta a, season khat chhunga league goal khung hnem ber Chelsea (103 goals) tluk turin goal khat bak an mamawh tawh lo; Pep-a naute hian match thum khelh hmabak an la nei.
EPL champion hian Pathianni zan khan West Ham chu 4-1 in an luhchhuah a, point 93 hmu tawhin an khelh hmabakah hnehna an chang vek a nih chuan point 102 an hmu tling thei dawn. Record ding lai Blues-in 2004-05 season-a an siam (95 points) pawh an phak teuh tawh hle.
London Stadium-a inkhelah Man City tan Leroy Sane, Gabriel Jesus leh Fernandinho ten goal an khung a, defender Pablo Zabaleta-a'n anmahni lamah a ti lut palh bawk. England international Raheem Sterling-a'n goal khung lo mah se a ṭhiante khung tur vawi thum a siamsak thung.
Pep a lawm
A naute khelh danah Manchester City manager Pep Guardiola a lungawi hle, "Number hi chu kan hnathawh ṭhat rawn lan chhuahna a ni. Record ding lai kan hnaih ta hi a lawmawm hle a, kan thei a nih phawt chuan khum kan tum ang.
"Kan match lehpek chu Etihad Stadium-ah kan khel dawn a, hnehna kan chang a nih chuan point 96 a nih chiah ang," a ti a, Jose Mourinho kaihhruai Chelsea in point hmu hnem record an lo siam tawh chu an khelmualah ngei nomawi chawi chunga khum a hlut bik tur thu a sawi.
Man City tan chanchin lawmawm a indawt chhoh zut laiin, an hneh tak West Ham tan erawh an tlarhnung phui lo lutuk chu buaina tham a tling. David Moyes-a naute box chhungah pakua ngawt an awm nachungin goal an chhuah tho, City goal nawr na tak chu anmahni lamah an tih luh phah a ni.
Hammers hian point 35 hmuin table-ah 15-na ni mah se, tla thei dinhmuna ding lai Southampton aiin point hnih chiahin an sang zawk a, Saints aiin an goal difference a chhe zawk bawk - match thum khelh hmabak an la neih avangin an dinhmun a la him lo hle.
London club manager Moyes chuan, "Kan hmabaka hnehna chang thei turin kan ṭha tawk a, a hniam pathum zingah kan awm rih loh avangin inrintawkna pawh kan nei tur a ni," tiin inhamtan ngei a tum thu a sawi.