Hamilton hun a thleng ta

Formula 1 champion lai Lewis Hamilton tan hun ṭha a inher chhuak ve ta. Pathianni zana tlan Azerbaijan Grand Prix-ah Hamilton-a'n hnehna a chang a, tun season chhunga a chakna hmasa ber a ni nachungin driver championship hmahruaitu a ni zui nghal.

Baku City Circuit-a intlan­siakah Mercedes driver Hamil­ton-a'n darkar khat, minute 43 leh second 44.291 chhungin lap 51 a tlan thleng a, car intlansiakna sang berah hian vawi 63 hnehna a channa chiah a ni.

Britain tlangvalin hnehna chang tur hian vanneihna a mamawh, lap hnuhnung pahnihah chiah hma a hruai! Mahse, world champion vawi li ni tawh Hamilton hi Ferrari driver Kimi Raikkonen aiin hun pawimawhah a huaisen zawk a, a tum ram a thlen theih phah.

Season bul ṭan fuh tak Sebastian Vettel-a'n pole aṭanga bul ṭanin hnehna chang turin a dinhmun a ṭha hman, mahse safety car vawi hnih a rawn tlan hnuah Ferrari driver-a'n tih fuh tawk loh a nei zauh a, palina dinhmunah a lungawi a ṭul.

Mercedes driver pakhat zawk Valtteri Bottas pawh hma­hruaitu ni reng thei mah se tyre buaina a nei a, lap thum chauh tlan hmabak an neih tawh laia a chet fuhlohna vang hian a hnufual phah hle, Hamilton-a teammate hi 14-naah a thleng hram a ni.

Vettel aia point lia sang zawk Hamilton chuan, "Intlansiak harsa leh khirhkhan tak mai a ni a, a pawimawh ber chu dawhtheihna a ni. Valtteri leh Vettel te khan hnehna chan phu khawpin an tlan ṭha a, mahse infiamnaah chuan a vannei leh vanduai kan awm ṭum a awm a ni," tiin a sawi.

Renault car khalhtu Car­los Sainz chu pangana niin, Charles Leclerc (Sauber) pawh­in a point hmasa ber hlawh chhuak turin parukna a ni bawk. World champion vawi hnih ni tawh Fernando Alonso chu pasarihnaah a thleng a, McLaren driver hian Mercedes leh Ferrari te an tluk loh thu sawi mah se an car neih ang tawkin a tlan ṭha thei rih hle.