La Liga champion Barcelona
Rin lawk ang ngeiin Barcelona chu La Liga champion an ni ta–Catalan club hian Pathianni zan khan an mikhualna ramah Deportivo La Coruna chu 4-2 in an hneh a, match li khelh tur la nei mah se umphak theih an nih tawh loh avangin an champion.
Ṭum dang ang bawkin Lionel Messi chu player langsar a ni a, Argentine forward hian hattrick a siam–Philippe Coutinho chuan goal khat a khung ve bawk a, mualneitu team tana Lucas Perez leh Emre Colak te goal khungin awmzia a nei lo.
Barcelona tan La Liga-a an champion vawi 25-na a ni a, vawi 33 champion tawh Real Madrid chu nomawi pariatin an la phak lo–Catalan club hian an hmabak match li-ah tlawm hmel an hmu lo a nih chuan season tluana tlawm lo chungin La Liga nomawi an chawi dawn tihna a ni.
Barca inkhel
Barcelona-in champion turin vawi khat chak a tawk tih an hria a, minute sarihna lek aṭangin goal an khung ṭan. Barca tana goal hmahruai khungtu hi Coutinho a ni a, goal chung kil sirah mawi zetin a khung–Liverpool-a a goal khung ṭhin ang tho kha a ni a, he goal entu Liverpool fan-te lung a leng khawp ang!
Minute 38-naah Messi-a'n a goal hnihna a khung a, mah se Deportivo an awm mai mai bik lo. Lucas Perez leh Emre Colak ten mualneitu team tan goal khat ve ve an khung ve leh a, minute 80 a nih thlengin 2-2 a ni a, Barca-in champion turin match khat dang an nghah a la ngai dawn niin a lang.
Mahse, hun pawimawhah Barca tan chhandamtu Messi a lang leh a, Argentine striker hian minute 82-na leh 85-naah Barca tan goal rawn khung lehin hattrick a siam–Deportivo tan chhanletna hun a awm tawh lo a, Barcelona an champion.
Chhanna petu Valverde
Barcelona-in May 2017-a Ernesto Valverde an lakluh thu an puan khan football khawvelin rinhlelhna mitmeng nen Athletic Bilbao aṭanga Barca zawmtu coach hi an thlir a, beiseina neih dan thiam an harsat.
Mahse, Valverde-a'n Barca-a a season hmasa berah club lian enkawl tur pawhin a ṭha tawk tih a pholang a, La Liga nomawi a chawi nghal–Barca tan tun season-a an nomawi pahnihna a ni a, Copa del Rey nomawi chawi turin Sevilla chu 5-0 in an lo sawp tawh.
Hetihlai hian Champions League-ah erawh Barca-in beisei an phak lo a, quarterfinal aṭangin AS Roma-in an hnawt chhuak. Spanish manager tana season thar atana chona awm tur chu European champion nih a ni ang.