Clay Court Roreltu Rafael Nadal

King of Clay tia hminglem an pek Rafael Nadal tan a lalna ramah hna hautak thawh tur a awm rih lo. World number 1 Nadal hian Pathianni zan khan Stefanos Tsitsipas chu 6-2, 6-1 in a hneh a, a vawi 11 nan Barcelona Open nomawi a chawi.

Kum 31 mi Nadal-a'n semifinal-a hnehna a chan chiah khan clay-ah match 400 a chak tling tawh a, kum 19 mi Tsitsipas lakah minute 40 chhungin set khatna a la a, set hnuhnung zawkah erawh game khat chiah a hloh avangin set la turin minute 27 bak a mamawh tawh lo.

Grand Slam vawi 17 champion tawh Nadal-a'n April thla chhung vekin a vawi 11 nan Monte Carlo Masters title a la tawh bawk a, major tournament khelh hmabak French Open-ah pawh a champion leh a nih chuan a vawi 11-na tur tho a ni ang.

Spain tlangval Nadal hi khawvelin a hmelhriat ṭanna chu clay court-ah a ni a, tennis a khelh hun chhunga nomawi 77 a chawi tawh zinga 55 chu clay court tournament aṭanga a vuakchhuah te an ni hlawm–a inkhelh thiam bikna hmunah hian a la hlawhtling chhunzawm zel rih pawhin a rinawm.

Nadal-a Court
Barcelona Open buatsaihtute lamin Nadal hi a hlawhtlin em avangin an inelna hmun pui ber hi 'Rafael Nadal Court' tih hialin hming an pe tawh, ama hming chuanna court-ah ngei hlawhtlinna a chang zui hi Nadal tan a lawmawm dan a dang zual ngei ang.

Nadal chuan, "Season hmasa khan vawi 10 ka champion vangin video min siamsiak a, kuminah a vawi 11-na vangin an siam leh, ka tan chuan a hlu danglam bik hle a ni. Fans lamim min lawmin ka tan inkhelh a nuam em em a, hmun dang nena khaikhin theih loh hlimna chu he hmunah hian a awm," tiin a sawi.

Final-a a hneh tak Tsitsipas chungchang sawi zuiin Nadal chuan, "Stefanos chawlhkar ṭha tak i hmang a ni, i kum ala tlemin hmabak eng tak i nei," a ti. World number 63 Stefanos hi tun kara ranking chhuak tharah chuan a sang 50 zingah a tel ang, Greek player zingah hetiang dinhmun thleng thei hmasa ber tur a ni ang.

Kum 19 mi Tsitsipas hian final lut tur hian world number 7 Dominic Thiem leh world number 10 David Goffin te a hneh thei a, beiseina sang tak nen final khel mah se Nadal lakah tawnhriat a neih tam tawk loh a tuar–set khatna bikah chauh pawh unforced errors vawi 15 ngawt a nei, chutih rualin tun hnaia player beiseiawmte zingah a tel.