Old Trafford-ah Wenger an chawimawi

Pathianni zan khan Arsene Wenger chuan Arsenal manager nichunga Manchester United a hmachhawn hnuhnun ber ṭum chu a tawng. Ṭum dang ang thoin a incheina zahawm tak nen French manager chu Old Trafford-ah lutin mipuiin ding chungin zahna an lantir a, Sir Alex Ferguson-a'n thilpek nen a lo hmuak.

Sir Alex chuan tun hmaa a elpui ṭhin Wenger hnenah thilpek a hlan a, United manager Jose Mourinho chuan rawn zawm ve bawkin Premier League manager ropui pathumte inelna boruak tel miah loin an ding tlang a, hun duhawm bik a ni.

Arsenal aṭanga Manchester United zawmtu Alexis Sanchez pawhin inkhelh hmain a pu hlui a hmu a, lemchan thiam tak an ni ngawt a nih loh chuan an inkarah inhuatna a awm lo tih a lang.

Wenger a lawm
Inkhelh banah Wenger chuan, "Manchester United chungah ka lawm takzet a, an chet dan kha a mawi hle a ni. Inelna ṭan hmaa nomawi ka dawn vawi khatna a ni a, United an rem hre hle," tiin lawm thu a sawi a, United a fak tel bawk.

French manager Wenger chuan sawi chhunzawmin, "Thawnthu sei tak chuan a tawp a thleng ta. Arsenal hian United hi an la el chho leh ang a, chutiang hunah pawh chuan ka la ngaihven reng ang. Season tharah chuan Old Trafford-ah Arsenal hian hnehna an chan ngei ka beisei a ni," tiin Gunners leh United te an inel chhunzawm zel tur thu a sawi.

Wenger faktu Sir Alex
Premier League hi 1992-93 season aṭangin a inṭan a, Sir Alex Ferguson hoin Manchester United an vul a, an elpui ber chu Arsenal niin Wenger-a kaihhruaia hnuaiah London club hian United kal fawr lutuk tur an chelh ding a, club pahnih hian English football an chawi sang hle.

Sir Alex chuan, "Premier League tihlutu chu Arsenal leh United inkhel a ni a. Chutihrualin club sulhnu vangin Liverpool leh United te inkhel chu fixture zinga ka dahsan ber a ni a, anni hmachhawn kha chu a nawm dana dang a ni.

"Tunah erawh thil kalphung a dang a, Man City an rawn che ṭha a, anni bakah hian Liverpool, Arsenal, Chelsea leh Tottenham te hmachhawn chu player-ten an châk. Amaherawhchu, United leh Arsenal hi tuna kan hmuh Premier League siamtu hi a ni," tiin Wenger-a enkawl Arsenal chu league tihmuhnawmtu an nih thu a sawi.

Premier League manager zinga ropui ber Ferguson chuan sawi chhunzawmin, "Arsene-a'n Arsenal a zawm khan club tan ei leh in bakah fitness lam thlengin kalphung thar a rawn duang a, hmasawn kan duh avangin keini pawhin kan entawn a ni. Entirna ṭha tak chu lirtheia khalh laia kan hnung awm darthlalang hmanga kan en pah reng ang hian Arsenal laka inven nan an chet vel dan kan thli thlai reng a ni.

Arsenal nena kan khelh tawh chuan boruak a sang em em vek a, team pahnih leh manager pahnihin nomawi kan inchuh a, Premier League champion kan tum. Kan hunlai khan inhmuhthiam loh ṭum te chu awm bawk mah se Wenger hi a hnathawh avang hian ka zah a ni," tiin London club hlawhltinpuitu manager a fak.

Boruak dang deuh
United ṭantuten Wenger chungah zahna an lantir a, amaherawhchu football-in an ken tel 'in auh el' erawh an chhunzawm tho. Jose Mourinho hoten goal an khung hnuah United ṭantute chuan, "Arsene Wenger cham turin kan duh che," tiin an au a, Arsenal ṭantute an duai bik lo.

Gunners ṭantute chuan, "Helai hmunah hian Arsene Wenger-a hoin kan champion tawh," tiin an chhang let a, khelmuala chan ṭha zawk United ṭantute an tlawm lo, "Vawi 20, vawi 20," tiin an champion tawh zat chu chhuang takin an sawi.

A tawpah chuan nomawi a pawimawh a, kum 22 hnua Wenger-a chhuah chhan tur pawh kum 14 chhung league nomawi an chawi tawh lo vang a ni a. Kum 2002 khan Old Trafford-ah league champion an ni tih an nemnghet a, 1-0 a United hnehin match khat khelh hmabak nei chungin Premier League-ah an champion. London club hian 2003-04 ah nomawi chawi leh mah se tun thlengin league-ah an champion leh tawh lo a, manager ropui Wenger meuh pawhin Gunners a chhuahsan a ṭul phah bawk.