Napoli veltu Giovanni Simeone
Serie A champion nih tum Nopoli-in an chunga awm Juventus nena an inkar tih zimna hun ṭha nei mah se an hmang ṭangkai thei lo. Pathianni zan inkhelah Giovanni Simeone hattrick hmangin Fiorentina lakah 3-0 in an tlawm.
Stadio Artemio Franchi-a inkhelah defender Kalidou Koulibaly-a'n Simeone a pet avangin minute rukna lekah hnawhchhuah a ni a, minute 84 chhung chu tlem zawk ni chungin an khelhzui a ngaih phah.
Atletico Madrid manager Diego Simeone fapa Simeone-a'n a laka ṭhat chhuah lo Napoli tlarhnung lakah zahngaihna a lantir bik lo - minute 34, 62 leh 90+3-ah te goal khungin a team a chak pui.
Kar hmasa mai khan Napoli hian hun tawp dawna Koulibaly tauh luh hmangin Juventus an hneh a, 1990 hnua a vawi khat nan Serie A champion nih an beisei leh avangin an lawm hle. Mahse, tun ṭumah erawh Turin-a 'Hero' kha 'Zero' a ni thung.
Senegal international Koulibaly hi goal khung ngei tura ngaih Simeone lakah a foul a, video assistant referee (VAR) hmanga endik a nih hnuah hnawhchhuah a ni.
Napoli-in league match 35 an khelh aṭangin point 84 an hmu a, champion lai Juventus an phak lohna chu point li a ni - champion turin match thum khelh tur an la neihah an tan chak vek a tawk tawh lo a, an chunga awm Juve an chetsual tel a ngai tawh.