Scottish Premiership champion Celtic
Celtic chuan Scottish Premiership-ah a zawna vawi sarih an champion-na ni turin Pathianni zan khan Rangers chu 5-0 in an sawp.
Old Firm derby-ah hian Odsonne Edouard chuan goal hnih a khung a, James Forrest, Tom Rogic leh Callum McGregor te chuan goal khat ṭheuh an khung bawk.
Rangers goalkeeper Jak Alnwick chuan vawi thum ngawt save ṭha zet a nei a, English goalkeeper hi awm lo se Rangers hian goal tam zawk chhuah thei an ni.
Celtic hian Scottish football an thunun hneh hle. Season hmasa khan tualchhung football inelnaah champion vekin domestic treble an chawi a, result ropui a ni.
Brendan Rodgers-a enkawl team hian Premiership nomawi an chawi hma hian League Cup-ah an champion tawh bawk a, May 19 zanah Motherwell nen Scottish Cup final an khel leh bawk ang.
Celtic hian Scottish Cup hi an chawi leh a nih chuan domestic treble champion an ni dawn tihna a ni a, Scottish football chanchina domestic treble a zawna chawi thei hmasa ber an ni dawn tihna a ni.