Champion zia Chhuahtu Chelsea

Chelsea-in football hmuhnawm khelin Stamford Bridge-ah Southampton 3-1 in an hneh. Inrinni zan inkhelah Trevoh Chalobah hmangin Blues-in an khung hmasa a, Saints captain James Ward-Prowse-a'n penalty aṭanga siphurh a sut hnuah hnawhchhuah a ni. London club-in player 10-a khel Saints lakah Timo Werner leh Ben Chilwell te hmangin an khung belh.

Thomas Tuchel-a hote hian match zawnin Manchester City leh Juventus an hneh lo a, Manchester khaw club pahnih chelhtu Southampton lakah fiahna hautak an paltlang. German manager-in hnehna chang turin substitution awmze nei a siam a, Chelsea-in champion zia an chhuah.

Attacking football
Chelsea manager Tuchel-a'n squad a nei chhah tih a pholang a, Juve hneh lotute aṭangin player panga ngawt a thlak. Callum Hudson-Odoi, Ruben Loftus-Cheek, Trevoh Chalobah, Ben Chilwell leh Timo Werner te bul ṭantu zingah an tel.

Tan phat aṭangin Blues goal bawh a na a, Werner-a goal khung tur keeper Alex McCarthy-a'n a dang ṭha. Minute riatnaah goal a lut a, Chilwell-a corner pet chu Loftus-Cheek-a'n a tauh pial hnuah defender Chalobah-a'n ṭha zetin a tauh goal.

Saints-in chance an nei ve lo ni ber. Antonio Rudiger tih ṭhat chu Romelu Lukaku-a'n goal-ah chantir mah se Belgian striker hi a offside avangin pawm a ni lo. Hudson Odoi a cross ṭha zet pawh Werner-a'n a tauh lut a, mahse VAR hmanga en let niin goal luh hma hian Azpilicueta-a'n foul a nei hman - pawm a ni lo.

Fiahna chu
Southampton-in wing back Valentino Livramento-a'n Chilwell lakah penalty a hlawh chhuak a, James Ward-Prowse-a'n minute 61-naah siphurh a sut. Inkhel kalhmang a dang tak vek a, Chelsea hi point hloh thei an ni.

Saints captain Ward-Prowse-a'n ṭul lo takin minute 77-naah Jorginho a tlawh a, yellow card pek ni mah se VAR hmanga enlet a nih hnuah hnawhchhuah a ni. Player 10-a khel mikhual team-in goal venhim an tum a, an ṭang tluan teuh hle.

Mahse, Tuchel-a'n Loftus-Cheek aiah Ross Barkley a dah lut a, English midfielder hian a luh hnu lawkah Azpilicueta tan ball ṭha bik vawrhsakin Spanish wing back hian ṭha zetin a cross lut a, Werner-a'n a pet goal. Minute 84-naa Chelsea goal hi 'team goal' ṭha chungchuang a ni a, Saints tlarhnung dem theih a ni lo.

Chelsea-in an nawr na chhunzawm a, minute 89-naah Lukaku-a'n ban a tih per a, hemi per hi Azipilicueta-a'n ban a tih per lehnghal a, chumi per chu Chilwell-a'n nalh zetin a volley goal. Saints keeper McCarthy-a'n a dang hmain a lang a, tun ṭumah erawh Goalline Technology-in Blues a chhan a, goal-ah an pawm.

An lungawi lo
Chelsea tana Werner-a goal khung chu VAR hmangin pawm a ni lo a, goal khungtu Werner leh a siamtu Hudson Odoi ten tihsual nei lo mah se hemi hmaa thil thleng vangin pawm a ni lo. A tuartu Blues boss Tuchel a lawm lo a, Chelsea ṭantute pawhin a lawm lohna hi an ṭawmpui ang.

Saints manager Ralph Hasenhuttl a thinur a, red card an hmuh chhanah VAR buaipuitu Mike Dean a puh. Hasenhuttl chuan, "Mike Dean nen hian kan club boruak hi a ṭha lo, ka awm hnuah tun ṭum hi vawi thum red card min pekna a ni chiah. Martin Atkinson thurawn petu chu Dean a ni a, amah kha VAR a ni tih hriat khan pai dam a harsa hle," tiin a lungawi loh thu a sawi.

Chelsea-in point thum hlu tak an hlawhchhuah avangin hmahruaitu lailawk an ni. Nizan khan Liverpool leh Manchester City an inkhel a, chak zawk an awm a nih chuan London club chungah an awm ang.