Man United an vannei

Manchester United-in Aston Villa an hneh loh hnuah Inrinni zan khan Everton nen 1-1 in an inhnehtawk. Ole Gunnar Solskjaer-a hote hian champion tur rinkai zinga tel lo Southampton, Villa leh Toffees lakah point sarih an hloh.

Old Trafford-a inkhelah Anthony Martial hmangin minute 43-naah Man United-in goal khung hmasa mah se Everton-in Andros Townsend hmangin minute 65-naah siphurh an sut.

Toffees midfielder Tom Davies-a'n chakna goal khung theihna tur chance ṭha bik chu Yerry Mina pein goal-ah a chantir nachungin VAR hmanga enlet a nih hnuah goal-ah pawm a ni lo. Man United-in point hnih an hloh chungin point khat a hlawh chhuak hi an la vannei.

Everton goal khung danah Man United-in insiamṭhat an mamawhzia a lang. Fred leh Aaron Wan-Bissaka ten mual sirah Demarai Gray-a'n talput tir. Gray-a'n ṭha taka a lakchhuah hnuah Abdoulaye Doucoure pein Everton midfielder hian ṭha zetin Townsend a pe.

Luke Shaw-a a kal lohna tura kal avangin Townsend-a'n vengtu a nei lo a, chiang zetin a pet goal. Toffees winger hian Cristiano Ronaldo goal lawm danin a goal khung a lawm. Rafael Benitez-a hote an khel ṭha a, Solskjaer erawh ringlotu an pung sawt.

Everton lakah hian Ronaldo, Jadon Sancho leh Paul Pobga te bench-ah an awm a, Jesse Lingard a khel lo. Inkhel bul ṭantu zingah Scott McTominay leh Fred te an tel a, inkhel an thunun thei lo. A tawi zawngin Solskjaer-a'n team a rem fuh thei lo a; Manchester City, Chelsea leh Liverpool te nen huang khata dah a har ṭan.

Kum 48 mi Solskjaer chuan, "Season tluan kan thlir a ṭul a, chuvangin player ṭhenkhat kan hahdamtir chungchangah tihsual a awmin ka hre lo. Kan duh ang takin season bul ṭan lo mah ila, season liam ta ai chuan kan ṭan ṭha zawk," tiin inkhelh banah Ronaldo leh player ṭha dang bench-a a dah chhan a sawifiah.

International break zawhah Man United-in Leicester City, Atalanta, Liverpool, Tottenham, Atalanta leh Man City an hmachhawn dawn a, hmabak a hautak dawn hle.