Tour de Hmuifang a hlawhtling

Covid-19 vanga hun rei tak infiamna mumal taka kalpui theih loh hnuah Mizoram Cycling Association (MiCA) leh Mizoram sorkar Tourism Department ṭangkawp chuan October 2, Inrinni khan thirsakawr intlansiak Tour de Hmuifang chu hlawhtling takin an buatsaih.

Inelna hi category pahniha ṭhen a ni a, kum 35 leh a hnuai lamah Sihfa tlangval Mesak Vanlalvena chu pakhatna niin darkar hnih leh minute 14 chhungin a tlan thleng. Kum 35 chung lamah Lallawmsanga, Mission Veng chuan darkar hnih leh minute 25-ah a tlan thleng.

Tour de Hmuifang hi Zero Point, Mualpui aṭanga tlan ṭan a ni a; Tourism, Sports & ICT Development Board vice chairman TC Pachhunga'n a vai liam. Inelnaah hian Aizawl-a cyclist-te bakah Lunglei, Champhai, Serchhip, Kolasib leh Saitual aṭangtein an rawn tel.

Inelnaah hian kum 52 mi Dr. Malsawmkima, Mission Veng chu a upa ber a, kum 12 mi Lalramluahpuia Zote, Zemabawk chu a naupang ber a ni thung. Tourism minister Robert Romawia Royte chuan Tour de Hmuifang hi kum tina neih tum a nih thu a puang.

Category I-a pakhatna Mesak Vanlalvena hi Sihfa khua a ni a, Zemabawkah a awm mek. PUC aṭangin B.Sc a zo tawh a, nikum khan Hmuifang hi darkar hnih leh minute 20-ah a thleng a, kuminah record thar siamin darkar hnih leh minute 14-ah a thleng.

Category I Podium (L-R) : Malsawmkima (2-na), Mesak (1-na), Lalruatfela (3-na)

Category II Podium (L-R) : David Rualzakhuma (2-na), Lallawmsanga (1-na), R. Lalhmachhuana (3-na)

Kolasib aṭanga Tour de Hmuifang telte