Suarez-a'n amah duh lotu a vel

Ronald Koeman-a'n Barcelona a enkawl tirha hna hmasaa a neih chu a duh loh ho player chhuahtir a ni a, Barca fans tam takin an ngainat Luis Suarez chu phone kaltlangin a ruahmannaa a tel loh thu a hrilh!

Suarez-a'n Nou Camp-a a cham theihna tur a nih chuan a hlawh tihhniam a pawi ti lo a, bench-a ṭhut pawh pawi a tih loh thu thlengin a sawi - mahse, Uruguayan striker ngenna chu beng nei lo hnena thusawi ang chauh a ni a, ngaihsak a hlawh lo.

Barca duh loh Suarez hian an hmelma kumhlun Atletico Madrid lam a pan zui a, Madrid club tan goal 21 khungin kum sarih hnua a vawi khat nan league nomawi a chawipui zui - khawvela number 9 ṭha ber pawl mamawh lo nia inhria Barca an chesual.

A la tawp mai lo, Inrinni zan khan Atletico Madrid chuan tun hnaia talbuai tak Barcelona an mikhual a, Suarez-a'n Thomas Lemar khung tur a siamsak bakah goal khat a khung; 2-0 in Atletico an chak a, Suarez hian phone hmang anga a benga a kut dah chungin a goal khung a lawm.

Hei le Atletico
Wanda Metropolitano-a goal khung turin Atletico-in hun an mamawh rei lo. Minute 23-na lekah Joao Felix, Suarez leh Lemar-ten ball an inpek kual hnuah Lemar hian a hmawr bawkin goal hmahruai a khung.

Atletico-in inkhel an thunun a, hetihrual hian Barca lamin chance an nei ve tho bawk - goal khat an chhuah hnuah Catalan club tan Philippe Coutinho, Frenkie de Jong leh Memphis Depay ten hun duhawm an nei vek a, mahse, an vanneih zan a ni lo.

Barca-in goal khung an harsat laiin Suarez erawhin a goal khung thiam a la theihnghilh lo tih a pholang leh ta a, minute 44-naah a club hlui lamah a pet goal - Coutinho-a'n chance a nei ve leh bawk a, mahse, Atletico keeper Jan Oblak chuan ṭha takin a lo dansak.

Catalan club player hlui Antoine Griezmann chu hun tawp lamah Suarez thlakin luhtir a ni bawk a, mahse, French forward hian a thlak tak player angin a club hlui lamah goal a khung ve lo.

Hello Koeman!
Suarez-a'n amah duh lotu Ronald Koeman tih el chungin a goal khung a lawm a, Uruguayan striker hian tun season inelna hrang hrangah match 10 khelin goal nga a khung tling leh der ta - Barca player zinga tun season-a khung tam ber Depay chuan goal thum chiah a la khung.

Tun season La Liga-a a vawi khat nan Barca an tlawm a, mahse, match sarih an khelh tawhah vawi thum an khingpui an inhnehtawkpui avangin an dinhmun erawh a him lo hle - table-ah pakuana an ni mek a, Champions League match hnih an khelh tawhah an la tlawm ve ve bawk!

Atletico erawhin hmahruaitu Real Madrid aia match khata khel tamin Real an nih rual a, nizana inkhel Real result a zirin hei erawh danglam leh thei a ni thung.

Barca-in Atletico an lenchilh hmaa Spanish media-te chaw tui ber chu Koeman ban a nih dawn leh dawn loh chungchang a ni a, mahse, Barca president Joan Laporta chuan Inrinni zana team pahnih intawn hma hian, "Result chu eng pawh ni se, Koeman a bang lo ang," tiin Dutch coach an ban loh tur thu a sawi.

Koeman a pawr
Barca-in Koeman an ban loh tur thu an sawi a, a chhan sawi lo mah se a chhan niawma lang chiang tak chu pawisa a ni - Catalan club hian coach ban turin sum an nei lo a, an duh loh coach hi puan an la inzawnpui rih a ngai a ni.

Koeman chuan, "Laporta khan a tih tur dik tak a ti a, a ti ṭha hle pawhin ka hria. A nihna dik takah chuan tun ang huna thil a chian loh ruai reng chuan hnathawh a har a, thlen kan tum ber danglamna thlen turin hahdam a theih loh a ni," a ti a, Laporta nen phone-a an inbiak thu a sawi bawk.

Hrem vanga technical area aṭanga a naute ho thei lotu Koeman chuan sawizawmin, "Kan buaina hi a chinfel dan a awm a, zan khat thil thua tih theih erawh a ni lo. Theihtawp kan chhuah zel a ngai a, naupangte hun kan pek a ngai a, kan forward inhliamte an lo kir a ngai bawk," a ti.

Barcelona hian an match khelh leh tur hmasa berah October 17 zan khian Valencia chu La Liga-ah an mikhual dawn a, an tlawm leh a nih ngat chuan Laporta-a'n ngaihdan a thlak tawh mai thei.