Arsenal leh Brighton inhnehtawk

Inrinni zan Premier League inkhelah Arsenal chu Brighton & Hove Albion nen 0-0 in an inhnehtawk, khualmuala point khat hlawh chhuak Gunners tan result ṭha a ni - Brighton tan pawh lawmna tur a ni ang.

Mikel Arteta nauten season bul ṭan fuh lo mah se an insiamṭha ta, match sarih aṭanga point 10 hmuin pakuana dinhmun an luah leh tawh - October thla chhungin Crystal Palace, Aston Villa leh Leicester City te an la hmachhawn leh dawn.

Brighton an ṭha
Ruah a sur avangin Falmer Stadium a huh a, khelmual nalah Tottenham hneh hlim Arsenal player an che hleithei lo. Tharum ngah Brighton lamin hun ṭha an insiam zauh zauh, mahse Leandro Trossard leh Neal Maupay te an hriam tawk lo.

Pascal Gross-a corner pet chu Shane Duffy chuan ṭha takin lo tauh mah se goal pawnah chiah a kal a, keeper Aaron Ramsdale chetṭhat zan a nih bawk avangin goal an sual chhuak zo lo - point khatah an lungawi a ngai.

Brighton manager Graham Potter chuan, "Kan theihna zawng zawng kan hlan, khatiang ang a kan khel chunga hnehna kan chang zo lo kha a pawi. Chutihrualin chak zo lo mah ila team ṭha laka kan khelh danah a lungawi thlak," a ti.

Brighton hian point 14 an nei tawh - Everton, Manchester United leh Liverpool te nen an point a inzat - Reds hian nizan khan Manchester City an hmachhawn a, an point an la danglam thei; Potter-a naute season bul ṭan dan hi a duhawm hle.

Arsenal tlawm lo
Hliam vangin Granit Xhaka an chhawr thei lo, a hmunruak luahtu Albert Sambi Lokonga khel ṭha mah se Spurs an hneh ṭuma an game ang kha an khel chhuak phak lo - Thomas Partey erawh Arsenal midfield khaikhawmtu pawimawh a ni chhunzawm.

Bukayo Saka-a cross Pierre-Emerick Aubameyang-a'n a tauh goal lo chiah chiah a, ball keng thei Alexandre Lacazette luh hnuah Gunners goal nawr na deuh mah se an vannei ta bik lo - counter attack aṭanga remchang an insiam zeuh bak sawi tur an nei tam lo.

Emile Smith Rowe-a'n fal taka ball a tlanpui hnuah a shot pawp a, keeper Robert Sanchez tan hna harsa a ni lo. English rawlthar khan box laia awm Nicolas Pepe kha pass hma se a hlauhawm zawk a rinawm; Gunners ṭantuten an ui khawp ang.

Arsenal manager Arteta chuan, "Point kan hmuh hi kan phu tawk aia sang a ni, point kan hmuh theih chhan chu a bik takin hun tawp dawn lam minute 15 chhunga kan tlarhnung player-te khelh ṭhat vang a ni," tiin a sawi a, an khingpui Brighton a fak bawk.