SAFF Championship: India inlan hun a thleng

South Asian Football Federation (SAFF) Championship chu Zirtawpni khan khelh ṭan a ni a, Bangladesh-in 1-0 a Sri Lanka hnehin Nepal chuan 1-0 in inelna thlengtu Maldives an barakhaih bawk.

Vawiin tlai dar 4:30-ah champion beisei India-in an match hmasa ber an khel dawn a, Blue Tigers hian Bangladesh an hmachhawn dawn - team pahnih intawn hnuhnung ber June-ah khan 2-0 in India an chak a, zaninah pawh chak an beisei ang.

India squad-ah hian Vaivakawn rawlthar Lalengmawia (Apuia) chu Mizo awmchhun a ni a, Indian Super League-a player man to ber hian bul a ṭan dawn leh dawn loh sawi theih a la ni lo.

Bangladesh bihchhianna
Bengal Tigers (Bangladesh sawina) in an match hmasa berah Sri Lanka an hneh avangin inrintawkna an nei ang tih a chiang a, an coach thar Oscar Bruzon hi Indian football hrechiangtu a nih bawk avangin Blue Tigers hneh hi a châk dawn.

Kum 44 mi Spanish coach hian Indian club Sporting Goa leh Mumbai FC a lo enkawl tawh a, Mumbai City-ah assistant coach a ni tawh bawk. Celta Vigo youth team coach leh Real Mallorca assistant coach pawh ni tawh hian India bakah Maldives (New Radiant) leh Bangladesh (Bashundhara Kings) ah te club a lo enkawl tawh a, a tawnhriat hi Bangladesh tan a ṭangkai ang.

Bangladesh hian captain Jamal Bhuyan tih loh chu player langsar tia han sawi tur an nei lem lo a, Danish club ṭha FC Copenhagen aṭanga inzir chhuak midfielder hian Indian club Mohammedan SC tan pawh a lo khel tawh.

Chhetri telna
India-in Sunil Chhetri a neih chuan goal khung kawngah manganna tur a awm lo - kum 37 mi striker hi a kum tam ve deuh tawh mah se goal khung a la ṭhulh thei lo a, India tan match 120-a goal 75 a khung tawh hi belhchhah a duh ngei ang.

Chhetri chuan, "South Asia ram dang aiin kan chungnung a ni mai thei a, mahse, inkhel tinah hian indonaa kal ang maia kan beih a ṭul dawn a ni. Minute tawp thlengin kan bei ang a, 100% pe lo chunga khelh a thiang lo," a ti a, inelna chu a ngaih thutak thu a sawi.

India coach Igor Stimac chuan, "Kan duh ang result min pe thei tur ngaihtuah chungin kan khel ang. Maldives lakah Nepal-in counter attack an neih vawi khat an chakpui a, Bangladesh lahin penalty mak tak hmangin Sri Lanka an hneh bawk. Kan hmaah eng game nge inchhawp dawn ka hre lo a, engpawh hmachhawn tura kan inpeih a ngai a ni," tiin a sawi ve bawk.

India an ṭha em?
Stimac-a'n Maldives-a inkhel turin squad naupang tak a hruai a, India squad kum chawhrual hi kum 26 a ni - kum 20 mi ve ve Apuia leh Jeakson Singh chu squad-a naupang ber an ni a, midfield-a khel turin anni pahnih bakah hian Brandon Fernandes leh Anirudh Thapa te ho an la awm a, India an ngaihtuahawm loh.

Tlarhnungah goal veng turin Gurpreet Singh Sandhu a awm avangin a manganthlak loh a, tlarhnunga Chinglensana Singh leh Pritam Kotal te ho pawh Bangladesh tlarhma veng zo tur khawpa ngaih an ni - Sunil Chhetri kawppui awm mi erawh thlan thiam a har rih hle.

Zanin dar 9:30 hian Sri Lanka leh Nepal an inkhel dawn bawk a, Sri Lanka hian Queen Park Rangers Under-23 forward Dillon De Silva an nei a, Nepal hian Indonesian football-a player langsar ni thei Rohit Chand an nei bawk.