Chak dan thiam lo Burnley & Norwich!

Tun season Premier League-a chak la nei lo Burnley leh Norwich City chu Inrinni zan khan an intawng a, team pahnih hi goal khung loin an ṭin.

Burnley leh Norwich lo intawn tawh vawi 43-ah goal luh loh a la awm ngai lo a, Burnley khelmual Turf Moor-a inkhelah pawh goal a luh leh ngei a rinawm - mahse, team pahnih vanneih zan a ni lo a, an inhlau lo tawn viau chungin goal an pai tlat lo.

Mualneitu team tan Dwight McNeil chuan chance duhawm a nei a, mahse, kum 21 mi English winger hian vengtu nei lo chungin a khung thei lo - Burnley tan hian right back Matt Lowton chuan uiawm takin a tauh goal lo bawk.

Tun season khual-muala match li an khelh tawha goal la khung miah lo Norwich-in goal khungna hun ṭha an nei ve bawk a, Mathias Normann-a freekick pet ṭha zet chu Burnley keeper Nick Pope chuan ṭha zetin a lo dansak a, Norwegian midfielder Normann hian mawi taka ball a lakluh hnuin uiawm takin crossbar a tih per bawk.

Norwich-in hnehna chang zo lo mah se league match sarih an khelhnaah point khat an hlawh chhuak ve ta a, team 20 inelnaah table mawngphah an la luah mek thung. Burnley-in league match sarih an khelhah point thum an hmuhna a ni a, table-ah 18-na an ni mek thung.

Turf Moor-a inkhel boruak sangah hian referee Kevin Friend chuan first half chhung ringawtin yellow card panga a phawrh hman a, Burnley penalty beisei a pek loh nual avangin mualneitu team hi referee chungah an lawm lo khawp ang.