Champion lai Mumbai dinhmun a ṭha lo

Indian Premier League-ah champion lai Mumbai Indians chuan Irinnni khan Delhi Capitals an hneh lo a, playoff khel lo thei dinhmunah an ding. Inkhel dangah Rajasthan Royals chuan Chennai Super Kings an hneh a, playoff khelh beiseina an chhi nung ve zel.

Sharjah Cricket Stadium-a inkhelah Mumbai an bat hmasa a, 129/8 runs chauh an siam a, Delhi bowler Avesh Khan (15/3) leh Axar Patel (21/3) te an ngam lo. Delhi tan Shreyas Iyer (33*) leh Rishabh Pant (26) te an che ṭha a, over 19.1-ah 132/6 siamin hnehna an chang.

Sheikh Zayed Stadium-ah playoff khel tura tling tawh Chennai Super Kings-in an bat hmasa a, Ruturaj Gaikwad-a century (101*) leh Ravindra Jadeja (32*) te che ṭhain 189/4 runs an siam. Mahse, Rajasthan-in target sang tak hi 17.3 overs lekah 190/3 runs siamin an umpha.

Rajasthan tan Shivam Dube (64*), Yahsavi Jaiswal (50) leh Evin Lewis (27) ten run an siam tam ringawt lo a, an strike rate a ṭha tel bawk. Zirtawpni zan khan Punjab Kings-in Kolkata Knight Riders chu wicket ngain an hneh.

Zanin dar 7:30 hian playoff khel tura tling tawh pahnih Delhi Capitals leh Chennai Super Kings te an inkhel dawn a, heta chak zawk hi chuan qualifier 1 an khel thei ang.

IPL-ah hian team pariat an awm a, a sang paliin playoff an khel dawn. Qualifier 1-ah pakhatna leh pahnihna an inkhel ang a, heta chak zawk hian final an lut nghal dawn. Eliminator round-ah pathumna leh palina an inkhel ang a, heta chak zawk hian qualifier 1-a chak lo zawk nen final khel tur an zawng ang.