Season thar atana Mizoram cricket team an puang

Cricket Association of Mizoram (CAM) hnuaia Selection Committee chuan 2020-2021 season atana Mizoram criket team tur an puang chhuak a, state tana khel thei tur player 59 a chhawp chhuak - player hi thlitfim leh tur an la ni ang.

CAM secretary Mamon Majumder chuan, "Coronavirus vangin player an inkhel thei lo a, an mahni in lamah an theih ang tawk tawkin an taksa an in la fit. Inkhelh theih loh mah se team tur thlan a ngai a, kan theih ang tawka zauin thil kan ngaihtuah.

"Hrileng a ziaawm hunah practice leh inelna neih theih a ni dawn a, chumi hunah chuan tuna player kan thlante chet dan hi kan la zirchiang leh ang a. Chumi zawhah chuan Mizoram tana khel tur kan thlang ang," tiin Vanglaini a hrilh.

Senior team bakah hian under 23 leh under 19 team list pawh tarchhuah a ni bawk, anni pawh hi thlan chhin chauh la niin thlitfim leh tur tho an la ni. Team tinah hian state pawn player pathum zel a chhawr theih.

CAM hi Board of Control for Cricket in India (BCCI) hnuaia awm a ni a, India ram chhunga state hrang hrang inelna hoah chuan team a tir thei; mipa bakah hian hmeichhe inelna huangah pawh team a lo tir chhuak tawh ṭhin a ni.

Covid-19 vangin CAM hian 2019-20 season chu a titawp fel tawh. Mahuma Cricket League chu khelh laklawh lai ni mah se zawh hman a ni lo a, inelna hmachhawp dang pawh tihtawp vek a ni - beiseina nen season thar an thlir mek.