Juventus an chak hram

Hun tawp hma minute li chauh awm tawhah Manuel Locatelli-a'n Juventus tan goal a khung a, an mikhualna ramah Old Lady hian Torino chu 1-0 a hnehin point thum hlu tak an hlawh chhuak hram.

Juve chak hram
Juventus hi tun hnaiah an tlarhnung a phui lo takzet, season hmasa nena chhiar zawmin league match 20 chhung chu goal an chhuah ziah! An record chhe ber match 21 chu an hnaih hman hle - tunah erawh goal chhuah loin minute 90 an khel ta, chanchin lawmawm bik a ni ang.

Massimiliano Allegri naute tan Moise Kean, Weston McKennie leh Weston McKennie ten remchang nei mah se hun ṭha an bawhpelh vek, hun tawp dawnah Chelsea an hneh ṭuma goal khungtu Federico Chiesa thawhrah sengin Locatelli-a'n goal awmchhun a khung hram.

Bianconeri hian hliam vangin Alvaro Morata, Paulo Dybala leh Aaron Ramsey te an la chhawr thei lo - goal khung an harsat hi a mak hran lo. Mahse, nipui bazar laia an lakluh Locatelli chu mamawh chhanna a ni thei hlauh.

Arsenal pawhin an rim, mahse Juve thlang zawktu Locatelli chuan, "Max Allegri-a'n ka lakah beisei a nei sang a, thurawn tam tak min pe. A duh ang thlapin ka la khel chhuak lo a ni mai thei, chutih rualin point hmuhna goal khungtu ka nih avangin ka lawm," a ti.

Inter an chak
Serie A champion lai Inter Milan pawhin point thum hmu turin vanneihna an mamawh tel. Hun tawp dawn lama Lautaro Martinez-a penalty chhuih luh hmangin Sassuolo chu 2-1 in an lehthal thei hram a ni.

Sassuolo tan Euro 2020-a Italy champion puitu Domenico Berardi chuan minute 22-naah penalty a khung a, hun rei tak chhung chu an goal hi an hum thei. Mahse, second half-ah substitute Edin Dzeko chuan a sut, striker ṭha Martinez a inlar zui bawk.

Dzeko-a'n Inter tan tun season league match pasarihah goal ruk a khung ta. Brazil legend Ronaldo (1997-98) hnu lamah chuan Inter striker zingah hetiang ti leh thei hmasa ber a ni a, a champion pui phak ang em tih chu hunin a la hril dawn.

Manchester City striker hlui Dzeko chuan, "Match hmasa pasarih aṭangin goal ruk ka khung hi mak ka ti lo. Khelhpui ṭha tak tak ka nei, chu mai bakah champion team zawm ka ni. 100% rilru kan pe a nih chuan tih theih loh a awm lo," tiin a sawi.