Serie A an intlawhkhalh

Italian Football Federation (FIGC) chuan Covid-19 vanga harsatna thleng nawn thei chungchang an ngaihtuah a, an ruahman dan tharah chuan Serie A champion awm lo thut thei an ni!

Coronavirus vangin March 9 aṭangin Italian football hi an chawl lailawk. June 20 hian khelh chhunzawm leh tum mek a ni, ruahman dan chuan July thla tawp emaw August thlatir lamah season hmawr an bawk ang.

FIGC chief Gabriele Gravina chuan, "A pawimawh ber chu football a ni. June 20 aṭangin kan khel ṭan leh ang a, July thla laihawl thleng chu chhiarkawp dan hman a ngai dawn em tih hi kan ngaihven reng ang," a ti.

Serie A hi khelh chhunzawm se, a vawi hnih nan hripui vang hian an buai nawn thei. Harsatna a thleng nawn a nih a, league an chawlh leh a ngai a nih chuan chhiarkawp dan hmangin an chhut dawn.

An khelh zat leh point hmuh aṭangin season thara European football khel tur leh division hniam lama tla tur zawnna neih a ni ang a, nomawi chawi tur erawh an chhut tel lo ang - champion bik awm loin season an titawp dawn tihna a ni.

Champion awm theih dan kawng erawh a la awm tho, season an khel tluan a nih chuan dan pangngaiin hmahruaitu chu nomawi chawi tur an ni; league khelh zawh hmain fal takin hmahruaitu awm se, an khelh hmabak khelh hnuah pawh umphak theih tawh loh an nih chuan champion atana puan an ni dawn tho.

Serie A club lam chuan buaina an tawk nawn a nih chuan tlahniam bik awm loa kalpui an duh. Mahse, FIGC lamin vote hmangin thutlukna an siam a, vote thlaktu 18 zinga pathum chauhin tla hniam awm lo thlawp zawngin vote an ti tla.

Italian league-ah hian champion lai Juventus chuan Lazio lakah point khatin hma an hruai mek, a zawna a vawi kua nan nomawi chawi leh an tum mek.