Martinez thlakna tur player lian ka la ang - Marotta

Inter Milan chief executive Giuseppe Marotta chuan an striker Lautaro Martinez chu chelh an tum thu a sawi a, an chelh thei lo a nih chuan a thlakna tur player ṭha tawk tak an lak tur thu a sawi bawk.

Argentine striker Martinez hi European club lian dangte ngaihven a ni mek. San Siro-a contract nei lai a nih bakah a khelh meknaah a hlim thu sawi fo mah se club lian dangin sum ṭhahnem leh duhawm zawk nen an sawm chuan a tan hnar harsa tak a ni dawn.

Inter hian an captain hlui leh goal thun khawl ni ṭhin Mauro Icardi chu Paris Saint-Germain lamah loan hmangin an chhuahtir mek a, a loan hun a zawh hunah Paris club tan hian a nghetin a khel zui dawn a ni.

Antonio Conte-a'n tlarhma laia chhawr turin Romelu Lukaku nei mah se a ṭha leh langsar dang an neih lai chu Martinez hi a ni. Ani hi a chhuak palh a nih chuan hmasawn tum Inter tan Belgium international Lukaku chauh kawl kha a fuh lo thei.

Martinez chungchang sawiin Marotta chuan, "Tunah chuan a hmalam hun hi sawi chian a harsa hle. Kan inbiak hnuhnung berah erawh season kan hman chhunzawm tur atana rilru pe tur leh, league khelh laia beisei kan la neih thu ka hrilh.

"Barcelona an ni emaw, club lian dang emaw pawh ni se an lo duh ve hi a mak lo. Theihna nei sang leh hmabak eng tak nei a nih vang a ni, chelh duh viau mah ila chhuak thei a ni a, a chhuak a nih chuan amah thlak zo ngei tur player ṭha kan la ang," a ti.

Inter Milan hi PSG chhuahsan tur Edinson Cavani nen sawizawm mek an ni. Mahse Marotta chuan tun season chhunga goal 22 khung tawh striker nen inbiakna an la neih lo thu 

a sawi a, an inhnimhnaih lem loh thu a sawi bawk.