Champions League Liverpool tan final a hnai?

Champions League semifinal first leg-ah Liverpool-in 5-2 in AS Roma an sawp a, zanin dar 12:15 hian second leg khel turin Italy an pan ve leh dawn. Champions League-ah Liverpool hi vawi nga an champion tawh a, heng zinga nomawi pahnih chu Rome khawpuia an chawi a ni.

Ṭum dang ang chu ni se tam takin Roma hi an thaibo ngei ang. Mahse, he Italian club hi Barcelona laka tih theih loha ngaih tichunga semifinal lut an ni a, khawvelin he inkhel hi ngaihngam takin a hawisan thei lo.

Roma coach Eusebio Di Francesco chuan, "Liverpool laka kan comeback theih ring lotute chu inah mu lum mai rawh se," a ti a, Liverpool lakah comeback ropui lantir a tum.

Liverpool an buai?
Reds-in Roma an hmachhawn hmasak ṭumin Alex Oxlade-Chamberlain chu hliam vanga lakchhuah a ni a, Italian club fan-te tan hei hi phul hlutna tham a ni lo–goal nga an chhuah kha English midfielder chhuah hnua lut vek a ni!

Liverpool player zingah Adam Lallana, Emre Can leh Joel Matip chu khel thei lo chiang an ni bawk a, Sadio Mane erawh a hliam a dam tawh. Stoke City laka inlan thei lo player a dam tak avangin tlarhmaah Mohamed Salah, Roberto Firmino leh Mane an inkawp thei dawn–an hmuhnawm ang.

Reds assistant manager Zeljko Buvac chu season tawp thleng Anfield-ah hmuh tur a awm tawh rih dawn lo–Klopp-a thurawn lakna ber hi Mainz (2001) aṭang tawha German coach thachhang dawltu a ni a, tun hnaiah an inhmu thiam lo nia sawi a ni. Liverpool chuan hei hi phain mimal thil vang a nih thu an sawi thung.

Roma an bang lo...
Italian club-in chanchin lawmawm lo an nei ve tho a, Liverpool an mikhual hunah Anfield-a penalty pet goal-tu Diego Perotti chu a inlan thei dawn lo. Kum 29 mi winger hi hliam vangin kar hnih tal a chawlh a ngai dawn.

Roma tan Kevin Strootman a inlan theih dawn leh dawn loh a la chiang lo bawk a, Dutch midfielder hi khelmual laiah Daniele De Rossi nena inkawp ṭhin a nih avangin a awm loh chuan Roma tan channa nasa tak a ni ang.

Liverpool tana hriat-reng tur erawh Roma hian goal khung an harsat lo–Reds laka goal nga an chhuah hnuah Serie A lamah goal khung an thiam tih an pholang a, an match hnuhnung berah Chievo chu 4-1 in an sawp.